Մարկոս 3:7-35 ԴԱՍ # 6
ԱՐԴՅՈՔ ՄԵՆՔ ԱԶԳԱԿԱՆ ԵՆՔ, ԹԵ՞ ՔՆՆԱԴԱՏՈՂ

I. Ողջույնի խոսք. (կամուրջ):
ՀԱՐՑ — Ձեզնից քանի՞սն են իրենց Աստծո կողմից կանչված զգում։ (Խնդրեք իրենց՝ բարձրացնեն ձեռքերը)։
ՀԱՐՑ — Ընկերները կամ ընտանիքը ձեր՝ հավատքից կամ Աստծո կանչից հետ կանգնելու հարցում ի՞նչ դեր են ունեցել։
ՊԱՏ․ — Թույլ տվեք՝ մի քանիսը կիսվեն իրենց փորձառությամբ, եթե, իհարկե, ցանկացողներ կան։
ՀԱՐՑ — Քննադատությունն ու սխալ հասկացվելը ինչպիսի՞ ազդեցություն է ունեցել ձեզ վրա։
ՊԱՏ — Հենց հավատացյալների կողմից քննադատությունը ձեզնից ոմանց բավականին խորը ցավեցրել և վիրավորել է։
II. Հիսուսի գործողությունները:
Ա. Գործողությունները ծովափում։ Մարկոս 3:7-12։
>>>> Ինչ — որ մեկը թող կարդա Մարկոս 3:7-12:
ՀԱՐՑ — Կարո՞ղ ենք Հիսուսի ծառայությունը համարել բացահայտ հաջողված։ Մարդկանց բազմությունը մե՞ծ էր։
ՀԱՐՑ — Ինչպե՞ս դու քեզ կզգայիր, եթե քո ծառայությունն էլ նույն կերպ հաջողվեր։
ՀԱՐՑ — Բազմության հետ աշխատելիս՝ ինչպե՞ս Հիսուսն օգտագործեց իր հեռատեսության, տրամաբանության, ինչպես նաև ծրագրելու կարողությունը։
ՊԱՏ․ — Առնվազն երկու եղանակով․
1) Նա խնդրեց, որ իրեն նավակ տրամադրվի՝ խոսելու համար, քանի որ Նա կանխատեսում էր մարդկանց մեծ բազմության ներկայություն (3:9)։
2) Նա մերժեց և չընդունեց դևի վկայությունը (3:12)։ Երբեմն գովաբանվելու մեր ցանկությունը բավականին մեծ է լինում։ Հիսուսը գովաբանվելու բացարձակ կարիք չուներ և ոմանցից գովաբանվելը կտրականապես մերժեց։
Բ. Գործողություններ լեռներում։ Մարկոս 3:13-19։
>>>> Ինչ — որ մեկը թող կարդա Մարկոս 3:13-14:
ՀԱՐՑ — Ինչո՞ւ Հիսուսն ընտրեց Իր աշակերտներին։
ՊԱՏ․ — Աշակերտների ընտրությունն ուներ երկու նպատակ.
1) որպեսզի լինեն Իր հետ և լինեն մտերիմ (3:14),
2) որպեսզի նրանք քարոզեն և ընդլայնեն ծառայությունը։
Ուշադրություն դարձրեք, որ ուսուցանելը Նրա հիմնական նպատակն էր։
>>>> Ինչ — որ մեկը թող կարդա Մարկոս 3:15-19:
ՀԱՐՑ — Ի՞նչ էր տրվել աշակերտներին։
ՊԱՏ. — Նրանց տրվել էր ուժ և զորություն։ Երբ դու մոտիկ ես Հիսուսին, սա անխուսափելի է։ Այնուամենայնիվ, զորությունը քեզ և քո մեծարման համար չէ, այլ չարի դեմ պայքարելու և դևերի կողմից ճնշվածներին օգնելու։ Բացի այդ, ինչում մենք շուտով կհամոզվենք, Հիսուսի զորությունը ստանալուց հետո քեզ այլ տեսակի բան կտրվի, քան հարգանքն ու փառքը։
Ծանուցում: Իր գործը բազմապատկելու համար՝ Հիսուսը հեռատեսություն կիրառեց մարդկանց ընտրության ժամանակ։
III. Ընդդիմություն. Մարկոս 3:20-30։
Ա. Ընդդիմություն կամ ընտանիքի կողմից սխալ հասկացված լինելը։
Ծանուցում: Մարկոսը գրել է, որ Հիսուսը հզոր էր, անշահախնդիր, կամեցող, հայտնի, շատ խելացի և հեռատես Իր գործունեությունները կազմակերպելու և իրականացնելու մեջ։ Հիսուսն այն առաջնորդն էր, որ, անկասկած, արժանի է մեր հիացմունքին։
>>>> Ինչ — որ մեկը թող կարդա Մարկոս 3:20-21:
ՀԱՐՑ — Կարծես թե Հիսուսի սեփական ընտանիքն անհանգստացած էր Հիսուսի աշխատանքային գրաֆիկով, և այսպիսով՝ Նրա ընտանիքն ինչպե՞ս էր հասկանում Իր գործունեությունը։
ՊԱՏ․ — Նրանք կարծում էին, որ Նա խելքը թռցրել է։ Պատկերացնո՞ւմ եք. Աստծո Որդուն խելքը թռցրած էին համարում։
ՀԱՐՑ — Արդյո՞ք Հիսուսն իրականում խելքը թռցրել էր։
ՊԱՏ․ — Մենք գիտենք, որ քննադատությունը տեղին չէր. տես 3:9, 12 և 14։ Հնարավոր է՝ Նրա ընտանիքին դուր չէր գալիս Հիսուսի գործունեության ինտենսիվությունը, բայց Նա ,անկասկած, ռացիոնալ էր մտածում։ Այսպիսով, քննադատությունն ընդհանրապես տեղին չէր։
ՀԱՐՑ — Քեզ զարմացնո՞ւմ է այն փաստը, որ Նա սխալ էր հասկացված Իր սեփական ընտանիքում։
ՊԱՏ․ — Այստեղ կարելի է երկու բան ընդգծել.
1) Մենք պետք է չզարմանանք և անգամ ակնկալենք նման վերաբերմունք։ Անկախ նրանից, թե որքան լավ ենք մեզ դրսևորում, սա անխուսափելի է, երբ մենք լրջությամբ ենք հետաքրքրված Աստծով։ Նույնիսկ Հիսուսին քննադատեցին։
2) Հիսուսը չարձագանքեց քննադատությանը։
ՀԱՐՑ — Մենք պե՞տք է արձագանքենք նման քննադատություններին։
Այս առումով ի՞նչ փորձառություն ունեք անցյալում։ Արդյո՞ք կարիք կա մեր համբավով այդքան մտահոգված լինել։
Բ. Քննադատություն կրոնական իշխանությունների կողմից․Մարկոս 3:22-30։
>>>> Ինչ — որ մեկը թող կարդա Մարկոս 3:22-27:
ՀԱՐՑ — Կրոնավորների կողմից քննադատությունն արդարացի՞ էր։
ՊԱՏ․ — Ո՛չ։ Նրանց քննադատությունն էլ էր անիրավացի։ Դարձյալ մի զարմացիր, երբ որոշ կրոնական իշխանություններ խանգարեն Աստծո գործին։
ՀԱՐՑ — Հիսուսն այս անգամ արձագանքե՞ց։
ՊԱՏ․ — Այո։
ՀԱՐՑ — Ի՞նչ բնույթի պատասխան տվեց։
ՊԱՏ․ — Նրա պատասխանը կարելի է համառոտ գրառել այսպես․
1) Սկզբում Հիսուսը հռետորական հարց տվեց. նա 23-րդ համարում առաջարկեց մարդկանց Իր հետ մտածել։ Հռետորական հարցը հենց նման նպատակներ է հետապնդում։ «Սատանան ինչպե՞ս կարող է սատանային դուրս հանել»։ Հաջորդիվ Հիսուսը շարունակեց առակներով։
2) Հետո Հիսուսն առակներում հետևյալ ասացվածքն է ասում՝ առավել ընդգծելով 24-րդ համարում ընդհանուր համաձայնեցված ճշմարտությունը։ Եթե խմբի մեջ երկպառակություն կա, ապա այն չի կարող հարատևել։
ՀԱՐՑ — Ձեզանից քանի՞սն են պառակտված խմբում խաղացել։
ՀԱՐՑ — Արդյո՞ք այդ թիմը հաջողել է։
3) Հետո նրանց Հիսուսը պատմեց նախորդին շատ նման մեկ այլ առակ կամ մեկ այլ ավանդականորեն համաձայնեցված ճշմարտություն՝ գրառված 25-րդ համարում։ «Եվ եթե մի տուն ինքն իր մեջ բաժանված է, ապա այդ տունը չի կարող կանգուն մնալ»։
4) Վերջում Հիսուսն եկավ նախնական եզրակացությանը։
ՀԱՐՑ — Հիսուսն ի՞նչ եզրակացության եկավ 26-րդ համարում։
ՊԱՏ․ — Տրամաբանորեն անհնար էր, որ Հիսուսը սատանայի կողմնակից լիներ, որովհետև այս դեպքում սատանայի թագավորությունը կոչնչացներ ինքն իրեն, բայց մենք գիտենք, որ սատանայի գործը բավականին հաջող է առ այսօր։
Հաջորդ քայլով Հիսուս մեկ այլ տրամաբանական եզրակացություն արեց, բայց այս անգամ օգտագործելով կարճ առակ։
ՀԱՐՑ — Ո՞րն է 27-րդ համարի իմաստը։
ՊԱՏ․ — Ուժեղ մարդը սատանան է։ Հիսուսը սաստում էր սատանային՝ ճնշված մարդկանց կյանքից նրան վտարելով։ Հիսուսի գործողություններն Իր զորության ապացույցն էին։ Նա կարող էր սատանային հաղթել։
Ծանուցում: Հիսուսն այսքանով չսահմանափակվեց։ Նրան ավելին էր հետաքրքրում, քան միայն վեճը հաղթելը։ Հիսուսը չէր ցանկանում պարզապես «հաղթել»։ Նա իրոք ցանկանում էր օգնել Իր քննադատներին, որովհետև սիրում էր նրանց։ Օրինակ՝ լավ ծնողը չի ցանկանում երեխայի հետ վեճում ուղղակի հաղթող դուրս գալ, այլ օգնել իր երեխային կյանքում լավագույնին հասնել։ Ուշադրություն դարձրեք, թե ինչ արեց Հիսուսը։
>>>> Ինչ — որ մեկը թող կարդա Մարկոս 3:28-30:
ՀԱՐՑ — Այստեղ Հիսուսն ի՞նչ էր անում։
ՊԱՏ․ — Նա նրանց զգուշացնում էր։ Իր ունկնդրին Հիսուսն զգուշացրեց 28-29 համարներում։ Չնայած կրոնական առաջնորդների թունոտ հարձակումներին՝ Հիսուսն ամեն դեպքում մտահոգված էր նրանց համար։ Հնարավոր է՝ սա է պատճառը, որ Հիսուսն Իր հարազատներին անմիջապես չպատասխանեց, քանի որ նրանք հոգևոր առումով վտանգված չէին։ Այստեղ Հիսուսի ունկնդիրն է վտանգված, որի պատճառով էլ Նա պատասխանում և զգուշացնում է։
ՀԱՐՑ — Ինչպե՞ս է վերը նշվածը կիրառելի այսօր։ Ինչպե՞ս է Հիսուսն զգուշացնում մեզ այսօր։
ՊԱՏ․ — Եթե մի պահ փարիսեցիների տեղը մեզ պատկերացնենք, ապա մենք չենք ցանկանում լինել Աստծո գործը քննադատող հավատացյալներ։ Իսկ եթե Հիսուսի տեղը պատկերացնենք, Նա օրինակ է ցույց տալիս, որ մենք պետք է անգամ մեր թշնամիների ճակատագրով մտահոգված լինենք։
Ծանուցում: Մենք պետք է աչալուրջ և ուշադիր լինենք, թե ում ենք քննադատում։ Մենք պետք է զգույշ լինենք, թե ինչ կրոնական մարդկանց ենք քննադատում։ Մենք, հնարավոր է, սխալվենք և արդյունքում մեր քննադատությամբ Աստծո գործի դեմ պայքարենք։ Դա ինձ վախեցնում է և ձեզ էլ պետք է վախեցնի։
ՀԱՐՑ — Արդյո՞ք մենք ունենք դևերին հանելու հրաշագործ զորությունը։
ՊԱՏ. — Քննադատության չարժանանալու պատճառներից մեկն էլ կարող է այն լինել, որ մեր ծառայությունն այնքան էլ զորավոր չէ։
IV. Աստծո հետ, այլ ոչ Իրեն հակառակ աշխատելու գաղտնիքը. Մարկոս 3:31-35:
>>>> Ինչ — որ մեկը թող կարդա Մարկոս 3:31-35:
ՀԱՐՑ — Ի՞նչն է մեզ դարձնում Հիսուսի ճշմարիտ ազգակից։
ՊԱՏ․ — Իր կամքը կատարելը, որն այս գլխում նշանակում է մոտենալ Իրեն, քարոզել և զորավոր լինել (3:13, 15)։ Սա նշանակում է, որ մենք պետք է զգույշ լինենք, թե ինչ և ում ենք քննադատում։ Մեր խնդիրն է Հիսուսի գործերի նման գործեր անել և օգտագործել Իր կողմից տրված իշխանությունը։ Բազմիցս Աստված ինձ ասել է, որ ես իմ էներգիան պետք է ծառայության և ուրիշներին օգնելու ուղղությամբ կենտրոնացնեմ, այլ ոչ թե քննադատելու այն, ինչ լիակատար չեմ հասկանում։
V. Մեր ուշադրությունը կենտրոնացնենք՝ ապացուցելու մեր ազգակցական կապը։ Մենք ազգական ենք, թե՞ քննադատ։
ՀԱՐՑ — Ինչպե՞ս ապացուցել, որ մենք կանչված ենք՝ օգտվելով վերը նշված տողերից։
ՊԱՏ․ — Եթե մենք ունենք Իր զորությունը, ապա դա ապացույց է, որ մենք արժանի ենք աշակերտ կոչվելու։ Նրանք կանչված էին ոչ թե քննադատելու, այլ քարոզելու և դևերին հանելու։ Եթե մենք քննադատներ ենք, ապա հնարավոր է՝ մենք փորձում ենք թաքցնել մեր անզորությունը։ Որոշ քրիստոնյաներ քննադատում են այլ ծառայողների, մինչդեռ ծառայությունները, որոնք քննադատում են, զորություն ունեն բժշկելու և էկզորսիզմ իրականացնելու:
ՀԱՐՑ — Ըստ այս հատվածների՝ ինչպե՞ս մենք փաստենք, որ մենք Հիսուսի ճշմարիտ գաղափարակիցներն ենք։
ՊԱՏ․ — Մենք պետք է Մարկոսի առաջին երեք գլուխները մանրակրկիտ ուսումնասիրենք, գտնենք ճշմարտությունը, ընդունենք այն և կիրառենք, այսինքն՝ հնազանդվենք ճշմարտությանը։ Մտածում ես՝ արդյո՞ք դու քրիստոնյա ես։ Ջորջ Մաք Դոնալդը գրել է․ «Ի՞նչ ես արել այսօր ուղղակի նրա համար, որ Հիսուս է դա ասել։ Կամ ի՞նչ ես արել ուղղակի նրա համար, որ Հիսուս ասել է չանել։ Անհեթեթություն է ասել հավատում ենք Հիսուսին, բայց չանել Իր ասածները»։ Ջորջ Մաք Դոնալդ, Ջորջ Մաք Դոնալդ Անթոլոգիա, (Լոնդոն: Ջեֆրի Բլես, 1970, էջ 75)։
Ծանուցում: Վերջում մի դիտողություն. «Եթե մենք կենտրոնանանք մեր իսկ հնազանդ լինելու գործոնի վրա, մենք զերծ կմնանք «Աստծո Որդու գործերը» քննադատելուց։ Թույլ տվեք ավարտել անապատի Հայրերի կողմից գրված այս կարճ պատմությամբ:
Աբբա Պապնուտիոսն ասել է. «Այնպես ստացվեց, որ ճանապարհով քայլելիս ես մոլորվեցի և հայտնվեցի մի գյուղում և տեսա որոշ մարդկանց, որ չար բաների մասին էին խոսում։ Սակայն ես լուռ կանգնեցի՝ աղոթելով իմ մեղքերի համար։ Այնուհետև մի հրեշտակ եկավ՝ սուրը ձեռքին, և ինձ ասաց. «Պապնուտիո՛ս, բոլոր նրանք, ովքեր դատում են իրենց եղբայրներին, այս սրով էլ կկորսվեն, բայց քանի որ դու չդատեցիր, այլ խոնարհեցրիր քեզ Աստծո առաջ՝ ասելով, որ դու մեղք ես գործել, քո անունը գրված է Կյանքի Գրքում»։ (Բենեդիկտա Ուորդ, «Անապատի քրիստոնյան», Մաքմիլլան, էջ. 202)։

ԱՍՏՎԱԾԱՇՆՉՅԱՆ ՀՂՈՒՄՆԵՐ

Մարկոս 3:7-35
Բազմություններ Հիսուսի հետևից
7 Եվ Հիսուսն իր աշակերտների հետ լճի մոտ գնաց։ Եվ Գալիլեայից ու Հուդայից մեծ բազմություններ էին նրա հետևից գնում։ 8 Բազում ժողովուրդ Երուսաղեմից, Եդովմից, Հորդանանից դուրս գտնվող շրջանից, ինչպես նաև նրանք, որ Տյուրոսի ու Սիդովնի շրջակայքից էին, երբ լսում էին, թե ինչե՛ր է անում, նրա մոտ էին գալիս։ 9 Հիսուսն իր աշակերտներին ասաց, որ բազմության պատճառով իր համար մի փոքր նավ պատրաստ պահեն, որպեսզի մարդիկ իրեն չսեղմեն։ 10 Քանի որ շատերին էր բժշկել, արդ ովքեր տառապում էին հիվանդություններից, նրա վրա էին թափվում նրան դիպչելու համար։ 11 Եվ երբ պիղծ ոգիները նրան տեսնում էին, նրա առաջն էին ընկնում, աղաղակում էին ու ասում. «Դու Աստծու Որդին ես»։ 12 Եվ նա խիստ սաստում էր նրանց, որ իր ով լինելը չհայտնեն։
Տասներկուսի ընտրությունը
(Մտթ. 10.1-4, Ղուկ. 6.12-16)
13 Հիսուսը լեռը բարձրացավ և իր մոտ կանչեց նրանց, ում որ կամեցավ։ Եվ նրանք նրա մոտ գնացին։ 14 Նա ընտրեց տասներկու հոգու, որ իր հետ լինեն, որ նրանց ուղարկի քարոզելու, 15 և որ նրանք ցավերը բուժելու, դևեր հանելու իշխանություն ունենան։ 16 Նա ընտրեց Սիմոնին, որի անունը Պետրոս դրեց, 17 Զեբեդեոսի որդի Հակոբոսին ու Հակոբոսի եղբորը՝ Հովհաննեսին, որոնց անվանեց Բաներեգես, որ է «Որոտման որդիներ», 18 Անդրեասին, Փիլիպպոսին, Բարթողոմեոսին, Մատթեոսին, Թովմասին, Ալփեոսի որդի Հակոբոսին, Թադեոսին, Սիմոն Կանանացուն 19 և Հուդա Իսկարիովտացուն, որն էլ մատնեց նրան։
20 Եվ տուն եկան. դարձյալ բազմություն հավաքվեց, նույնիսկ չկարողացան հաց ուտել։ 21 Նրա յուրայինները, լսելով, դուրս եկան նրան բռնելու, որովհետև կարծում էին, թե խելագարվել է։
Հիսուսը և Բեեղզեբուղը
(Մտթ. 12.22-32, Ղուկ. 11.14-23, 12.10)
22 Իսկ դպիրները, որ Երուսաղեմից էին եկել, ասում էին, թե Բեեղզեբուղ ունի և դևերի իշխանի ձեռքով է դևերին հանում։ 23 Այդ ժամանակ Հիսուսը, նրանց իր մոտ կանչելով, առակներով ասում էր նրանց. «Սատանան ինչպե՞ս կարող է սատանային դուրս հանել։ 24 Եթե մի թագավորություն իր մեջ բաժանվի, այդ թագավորությունը չի կարող հարատևել։ 25 Եվ եթե մի տուն ինքն իր մեջ բաժանվի, այդ տունը կանգուն մնալ չի կարող։ 26 Եթե սատանան ինքն իր դեմ դուրս գա և բաժանվի, չի կարող կանգուն մնալ. նրա վախճանը հասել է։ 27 Ոչ ոք, զորեղ մարդու տունը մտնելով, չի կարող նրա ունեցվածքը կողոպտել, եթե նախ այդ զորեղ մարդուն չկապի. հետո նրա տունը կկողոպտի։ 28 Ճշմարիտ եմ ասում ձեզ. մարդկանց որդիների բոլոր մեղքերն ու հայհոյանքները կներվեն, 29 բայց ով Սուրբ Հոգուն հայհոյի, հավիտյան թողություն չի ստանա, այլ հավիտենական դատապարտության կենթարկվի»։ 30 Հիսուսն այս ասաց, որովհետև ասում էին, թե նրա մեջ պիղծ ոգի կա։
Հիսուսի մայրն ու եղբայրները
(Մտթ. 12.46-50, Ղուկ. 8.19-21)
31 Հետո եկան նրա մայրն ու եղբայրները և դրսում կանգնած՝ նրա մոտ մարդ ուղարկեցին, որ նրան կանչի։ 32 Նրա շուրջը նստել էր բազմությունը։ Նրան ասացին. «Ահա մայրդ ու եղբայրներդ դրսում քեզ են ուզում»։ 33 Եվ նա պատասխանեց նրանց ու ասաց. «Ո՞վ է իմ մայրը, կամ ովքե՞ր են իմ եղբայրները»։ 34 Ապա իր շուրջը նստածներին նայեց ու ասաց. «Ահա իմ մայրն ու իմ եղբայրները։ 35 Որովհետև ով կատարում է Աստծու կամքը, նա է իմ եղբայրը, քույրն ու մայրը»։