ՄԱՐԿՈՍ 7:31-8:10 ԴԱՍ # 17
ԱՍՏԾՈ ԳԹԱՍՐՏՈՒԹՅՈՒՆԸ

I. Ողջույնի խոսք:

II. Ներածություն: Կարծես թե մարդկանց մեծամասնության հանդեպ մեղմ և բարյացակամ վերաբերմունքը լավագույնն է։ Այսօր Ամերիկայում դրան «nice»են ասում։ Եթե մենք կոպիտ չենք, խոսում ենք բարյացակամ և հեշտությամբ ենք կարեկցում՝ արտաբերելով խղճահարության խոսքեր, ապա մենք համարվում ենք «nice»-բարյացակամ մարդ։ Ավետարաններում Հիսուսը միշտ չէ, որ բարյացակամ է, բայց Նա միշտ գթասիրտ է։ Նրա գթասրտությունն ավելին է, քան խոսքերը, զգացմունքները կամ ոչ ոքի չցավեցնելու սկզբունքով առաջնորդվելը։ Հիսուսն ավելի արժեքավոր երևույթների հետևորդ էր։ Այն, ինչ Իր Էությունն էր, ավելի խորն էր և ավելի վեհ։ Մենք կարող ենք դիտարկել Հիսուսի զարմանալի, բայցևայնպես գործնական գթասրտությունը։ Եկե՛ք սկսենք։

III. Անհատի նկատմամբ կարեկցանքը և դրա ազդեցությունը. Մարկոս 7:31-37։
>>>> Ինչ-որ մեկը թող կարդա Մարկոս 7:31-35։
ՀԱՐՑ — Իր գործողություններում Հիսուսն ինչպե՞ս էր կարեկցանք ցուցաբերում։
ՊԱՏ․ — Այս անհատի նկատմամբ Հիսուսը կարեկցանք է ցուցաբերում՝ նրան առանձնացնելով: 1) Թերևս նրան չամաչեցնելու համար, քանի որ նա խուլ էր։ 2) Նաև, միգուցե, ամբոխի ուշադրությունից հեռացնելով՝ Հիսուսն առիթ ստեղծեց անհատական մոտեցման։ Հնարավոր է՝ մարդկանց ուշադրությունը խանգարեր այդ մարդուն կենտրոնանալ։
ՀԱՐՑ — Ձեզանից քանի՞սն ունեն ընկերներ, որ դուք կցանկանայիք՝ Հիսուսն օրհներ։
ՊԱՏ․ — Ի՞նչ են նրանց անունները։ Այս պահին գրե՛ք նրանց անունները ձեր Աստվածաշնչում կամ գրառումներում։
ՀԱՐՑ — Ըստ ձեզ՝ այդ օրհնությունն ի՞նչ բովանդակություն պետք է ունենա։
ՊԱՏ․ — Գրե՛ք ձեր մտածածը։
ՀԱՐՑ — Մենք ի՞նչ կարող ենք անել։ Ձեր ընկերոջն ինչպե՞ս կուղղորդեիք առ Հիսուսի ներկայություն։
ՊԱՏ․ — Մենք կարող ենք սկսել իրենց համար աղոթելով։ Մենք կարող ենք ընկերոջը բերել մեկի մոտ, ով, ըստ մեզ, ավելի լեցուն է Աստծո զորությամբ, օրինակ՝ աստվածավախ հարազատի, եկեղեցի հաճախող ընկերոջ կամ կրոնավոր առաջնորդի մոտ։
Ծանուցում: Հիսուսը ժամանակ հատկացրեց անհատապես շփվելու մարդու հետ։ Այս խուլը մարդ արարած էր, այլ ոչ թե ուղղակի հաճախորդ, և Նա դա չարեց «իր» հոգևոր գործի համար։ Նա Իր մատները դրեց մարդու ականջներին միգուցե նրա համար, որ խորհրդանշական ձևով նրան ցույց տա, որ Նա գործ է ունենալու (բուժելու է) ականջների հետ։ Ապա Նա թքեց այդ մարդու բերանի մեջ՝ խորհրդանշելով անկասկած նույն բանը. գործ է ունենալու լեզվի հետ։ Թե՛ հրեական, թե՛ հելլենիստական մշակույթում թուքը շատ էր կարևորվում՝ որպես բուժիչ ուժ։ (Մինչ դուք կծիծաղեք հին աշխարհի մարդկանց հավատալիքների վրա, հիշեք՝ ի՞նչ եք անում, երբ մատին մուրճով հարվածում եք կամ գազօջախի վրա այրում․ մատը չե՞ք դնում բերանը…) Ամենակարևորն այստեղ այն է, որ Հիսուսն այս մարդու հետ խոսում էր իր լեզվով․ Նա օգտագործում էր այդ մարդուն հասկանալի խորհրդանշային լեզուն։ Նա իրեն խոնարհեցնում և հավասարեցնում էր այս մարդուն։ Սերը պետք է գործնական լինի և այն հաճախ պետք է ֆիզիկապես ցուցադրվի։
Ուշադրությո՛ւն դարձրեք, որ Հիսուսն այս մարդուն երբեք չասաց, որ սիրում է նրան։
ՀԱՐՑ — Հնարավո՞ր է, որ Հիսուսի՝ այն ժամանակվա գործողությունները մեզ հուշեն, թե Նա ինչ կաներ այսօր։
ՀԱՐՑ — Եթե դուք ձեր ընկերներին իրոք դեպի Հիսուսի ներկայությունն առաջնորդեիք, ապա Հիսուսն ի՞նչ կաներ նրանց հետ։
>>>> Ինչ-որ մեկը թող կարդա Մարկոս 7:36։
Ծանուցում: Հետևյալ բառերն արդեն շատ հայտնի են․ «Ոչ ոքի չասես»։ Դուք երբևէ նկատե՞լ եք, թե մենք որքան շատ ենք ցանկանում ճանաչված լինել մեր կողմից տրված ֆինանսական օգնության կամ ծառայության համար։ Հիսուսը տարբերվում էր մեզնից։ Հիսուսի դրդապատճառները հաճախ են տարբերվում մեր դրդապատճառներից։ Մենք ցանկանում ենք և հաճախ ձգտում մեր բարի գործերի համար ճանաչվել, մինչդեռ Հիսուսն այլ նպատակներ ուներ։
>>>> Կարդացե՛ք Մատթեոս 6:1-4։ Թույլ մի՛ տվեք, որ եկեղեցական սովորույթները զրկեն ձեզ հավիտենական փառքից։ Հիսուսը մեզ խորհուրդ կտար օգնել և ոչինչ չասել, ծառայել՝ անելով մեր առավելագույնը՝ առանց շահադիտական ակնկալիքների։
>>>> Ինչ-որ մեկը թող կարդա Մարկոս 7:37։
Ծանուցում: Մարդիկ ապշած էին։ Հավանաբար նրանք ակնկալում էին, որ Հիսուսը միայն կօրհնի, բայց չի բուժի (Լեյն, էջ 266). բայց գուցե Հիսուսն ավելի՛ն կանի, քան այն, ինչ մենք ակնկալում ենք այսօր։
Ծանուցում: Նրանք փառաբանեցին Նրան։ Երկու տարբեր մարդկանց խնդրեք ունկնդիրների համար կարդալ հետևյալ երկու տեքստերը․
>>>> Ինչ-որ մեկը թող կարդա Ծննդոց 1:31:
>>>> Ինչ-որ մեկը թող կարդա Եսայի 35:5, 6, 10:
Ծանուցում: Բազում լավ մարդիկ, նաև ոչ այնքան լավ որոշ մարդիկ ձեզ կասեն, որ Հիսուսը միայն մարդ էր։ Անընդմեջ բոլոր ավետարաններում մենք տեսնում ենք Հիսուսի աստվածությանը վերաբերող ակնարկներ։ Թե՛ բնավորության, թե՛ զորությունը ցույց տալու առումով Հիսուսը գործում էր Իր Հոր նման:
********************************************************************************* Դուք Ինքնե՛րդ որոշեք, եթե ժամանակը թույլ է տալիս, օգտագործե՛ք այս բաժինը, կամ կարող եք բաց թողնել։
Ծանուցում: Մենք ավարտում ենք Մարկոսի ավետարանի 6-7-րդ գլուխները։ Քանի որ հրաշքներն Աստծո զորության առկայությունն են Հիսուսի անձում, հնարավոր է՝ Հիսուսի կողմից արված արտահայտությունը՝ «բա՛ց եղեք», կապ ունի «Ով լսելու ականջ ունի, թո՛ղ լսի» արտահայտության հետ (6:52, 7:16, 7:18)։ Հիսուսը ցանկացավ, որ այս մարդը ոչ միայն ֆիզիկապես ունակ լինի լսելու, այլ նաև «բացելու» իր սիրտը Հիսուսի գործերի և խոսքերի առջև։
Ծանուցում: Շատ գիտնականներ 6:31-7:37 հատվածներում նկատում են օրինակներ, որ կրկնվում են 8-րդ գլխում։

6:31-44՝ բազմությանը կերակրելը — 8:1-9
6:45-56՝ ծովով անցնելը — 8:10
7:1-23՝ փարիսեցիների հետ կոնֆլիկտը-8:11-13
7:24-30՝ հացի մասին խոսակցությունը — 8:14-21
7:31-36՝ բժշկությունը — 8:22-26
7:37՝ հավատքի խոստովանությունը — 8:27-30
*****************************************************************************
IV. Բազմության հանդեպ գթասրտություն. Մարկոս 8:1-10։
>>>> Ինչ-որ մեկը թող կարդա Մարկոս 8:1-3:
ՀԱՐՑ — Ինչո՞ւ Հիսուսը որոշեց նրանց կերակրել։
ՊԱՏ․ — Հիսուսը կարեկցեց նրանց։ Մարդիկ ծոմ էին պահում, որովհետև Իր հետ էին մնացել։ Հնարավոր է՝ նրանցից ոմանց ուտելիքն ամբողջությամբ սպառվել էր, և նրանք շարունակում էին Հիսուսին հետևել առանց ուտելիքի, քանի որ նրանք անչափ ոգևորված էին։ Ուշադրությո՛ւն դարձրեք, թե որքան գործնական է Հիսուսի գթասրտությունը։
Ծանուցում: Լսարանի կամ բազմության հանդեպ Իր դիրքորոշմամբ և մոտեցմամբ բազում կրոնական կամ քաղաքական առաջնորդներից Հիսուսը հաճախ շատ էր տարբերվում։ Նա Իր լսարանի մասին հոգում էր։ Որոշ առաջնորդներ շատ են ուրախանում այն փաստից, որ ունեն լսարան, կամ երանության մեջ են ընկնում, որ իրենց լսարանը հմայված է իրենցով, և նրանք չեն էլ մտածում հանդիպումից հետո իրենց լսարանի կարիքները գործնականում հոգալու մասին։
>>>> Ինչ-որ մեկը թող կարդա Մարկոս 8:4-10։
ՀԱՐՑ — Ինչ եք կարծում, ձայնի ի՞նչ տոնայնությամբ աշակերտներն իրենց հարցը հնչեցրին 8:4-ում։
ՊԱՏ․ — Հնարավոր է՝ քամահրանքով հարցրած լինեն, բայց, ամենայն հավանականությամբ, վրդովմունքով են հարցրել։ Հիսուսը միշտ իրենց պատկերացրածից ավելին էր աշակերտներից պահանջում։
ՀԱՐՑ — Հիսուսն ինչո՞ւ առաջ քաշեց 5-րդ տողի հարցը։
ՊԱՏ․ — Նրանց ներգրավելու համար։ Նա ցանկացավ աշակերտների ուշադրությունը և բարկությունը շեղել «այն, ինչ չունենք»-ի վրա կենտրոնանալուց, բայց փոխարենը խնդրեց օգնել այն ամենով, ինչ նրանք այդ պահին ձեռքի տակ ունեին (տվյալ պարագայում՝ յոթ փոքր հացը)։ Դուք կզարմանաք այն բանից, թե Աստված ինչ կարող է անել մեր խղճուկ ռեսուրսների հետ։ Ես հաճախ եմ մտածում մեր համայնքի կարիքների և անբավարար ռեսուրսների մասին, բայց եթե մենք սկսենք մեր ունեցածով ․․․
Ծանուցում: Նրանք փոխանցեցին ուտելիքը։ Հենց աշակերտների ձեռքով պետք է կերակրվեր կարիքավոր և սոված բազմությունը։ Իրականում աշակերտների արարքն էր, այլ ոչ թե նրանց զորությունը, որ կերակրեց բազմությանը։ Դա Աստծո զորությունն էր և մի՛միայն Իր զորությունը։
Ծանուցում: Այստեղ օգտակար է հիշել, որ Նա ցանկանում է մեզ և նրանց, ում մենք սիրում ենք, սիրել անհատական։ Հիսուսի կարիքն ունեցողներին մենք պետք է ուղղորդենք առ Հիսուսի ներկայություն։ Նա չի փոխվել։ Նա նույնն է այսօր, երեկ և ընդմիշտ։
Ծանուցում: Վերջապես, անգամ եթե Իր զորությունն է իրականում հոգում բազմության կարիքները, Նա ցանկանում է, որ մենք ներգրավվենք։

V. Ամփոփում: >>>>> Կարդացե՛ք Եսայի 29:18-19-ը։

ԱՍՏՎԱԾԱՇՆՉՅԱՆ ՀՂՈՒՄՆԵՐ

Մարկոս 7:31-8:10
Խուլ ու համր մարդու բժշկումը
31 Եվ դարձյալ Տյուրոսի ու Սիդովնի սահմաններից դուրս ելավ և Դեկապոլիսի սահմանների միջով Գալիլեայի լիճ գնաց։ 32 Նրա մոտ մի խուլ ու համր մարդու բերեցին և աղաչում էին, որ ձեռքը նրա վրա դնի։ 33 Հիսուսը նրան ժողովրդից հեռու՝ մի առանձին տեղ տարավ, իր մատները նրա ականջների մեջ դրեց և, թքելով, դիպավ նրա լեզվին։ 34 Հիսուսը դեպի երկինք նայեց, հառաչեց ու նրան ասաց. «Եփփա՛թա», որ նշանակում է «Բացվի՛ր»։ 35 Եվ նրա ականջներն իսկույն բացվեցին, լեզվի կապն արձակվեց, և վարժ խոսում էր։ 36 Հիսուսը նրանց պատվիրեց, որ ոչ ոքի չասեն. սակայն ինչքան էլ նա պատվիրում էր նրանց, այնքան նրանք ավելի էին տարածում։ 37 Չափազանց զարմանում էին ու ասում. «Սա ամեն բան լավ է անում. խուլերին լսել է տալիս, համրերին՝ խոսել»։
8
Հացի երկրորդ բազմացումը
(Մտթ. 15.32-39)
1 Այն օրերին, երբ դարձյալ շատ ժողովուրդ էր հավաքվել, և ուտելու բան չունեին, Հիսուսն իր աշակերտներին կանչեց ու նրանց ասաց. 2 «Այս ժողովրդին խղճում եմ, որովհետև արդեն երեք օր է՝ ինձ մոտ են և ուտելու ոչինչ չունեն։ 3 Եթե նրանց քաղցած արձակեմ իրենց տները, ճանապարհին կնվաղեն, քանի որ ոմանք հեռվից են եկել»։ 4 Աշակերտները պատասխանեցին նրան. «Ինչպե՞ս կարելի է այս ամայի վայրում նրանց հացով կշտացնել»։ 5 Հիսուսը հարցրեց նրանց. «Քանի՞ հաց ունեք»։ Նրանք պատասխանեցին՝ յոթ։ 6 Հիսուսը ժողովրդին հրամայեց, որ գետնին նստեն։ Եվ վերցրեց այն յոթ հացը, գոհություն հայտնեց, մասերի բաժանեց և իր աշակերտներին տվեց, որ բաժանեն. նրանք էլ բաժանեցին ժողովրդին։ 7 Ունեին նաև մի քանի փոքր ձկներ. նա օրհնեց ու ասաց, որ դրանք էլ բաժանեն։ 8 Կերան ու կշտացան. և յոթ զամբյուղ էլ ավելացած կտորներ հավաքեցին։ 9 Մոտ չորս հազար մարդ կար։ Ապա Հիսուսը նրանց արձակեց 10 և աշակերտների հետ իսկույն նավ մտավ ու Դաղմանութայի կողմերը եկավ։

Մաթեոս 6:1-4
Ողորմության մասին
1 «Զգո՛ւյշ եղեք, որ ձեր ողորմությունը չանեք մարդկանց առաջ՝ նրանց ցույց տալու համար, այլապես վարձ չեք ունենա ձեր Հորից, որ երկնքում է։
2 Արդ, երբ ողորմություն անես, մի՛ փողահարիր քո առաջ, ինչպես կեղծավորներն են ժողովարաններում և փողոցներում անում, որպեսզի մարդկանցից փառավորվեն։ Ճշմարիտ եմ ասում ձեզ. նրանք իրենց վարձն ստացել են։ 3 Բայց երբ դու ողորմություն անես, թող քո ձախ ձեռքը չիմանա, թե քո աջն ի՛նչ է անում, 4 որպեսզի քո ողորմությունը ծածուկ լինի, և քո Հայրը, որ տեսնում է ծածուկը, քեզ հայտնապես կհատուցի։

Ծննդոց 1:31
31 Եվ Աստված տեսավ, որ այն ամենը, ինչ որ արել էր, ահա շատ բարի էր։ Եվ երեկո ու առավոտ եղավ՝ օր վեցերորդ։

Եսայի 35:5-6
5 Այն ժամանակ կբացվեն կույրերի աչքերը, կբացվեն խուլերի ականջները։ 6 Այն ժամանակ կաղը կցատկոտի եղջերուի պես, և համրի լեզուն կօրհներգի, որովհետև անապատում ջրեր կժայթքեն, և ամայի տեղում՝ հեղեղատներ։

Եսայի 35:10
10 Տիրոջ կողմից փրկագնվածները ետ կդառնան ու բարձրաձայն երգերով կգան Սիոն, և նրանց գլխի վրա հավիտենական ուրախություն կլինի։ Ուրախության ու ցնծության պիտի հասնեն նրանք, և տրտմությունն ու հեծությունը պիտի փախչեն։

Եսայի 29:18-19
18 Եվ այդ օրը խուլերը կլսեն գրքի խոսքերը, և մթից ու խավարից ազատված՝ կտեսնեն կույրերի աչքերը։ 19 Հեզերի ուրախությունը կավելանա Տիրոջով, և մարդկանց մեջ կարիքավորները կցնծան Իսրայելի Սրբով: