ՄԱՐԿՈՍ 8:11-26 ԴԱՍ # 18
. ՀՈԳԵՎՈՐ ԿՈՒՐՈՒԹՅՈՒՆԸ ԵՎ ՄԵԿ ՆԿԱՆԱԿ ՀԱՑԸ

I. Ողջույնի խոսք։

II. Ներածություն:
ՀԱՐՑ — Վերջին ժամանակներս դուք ականատես եղե՞լ եք, երբ ուսուցիչը, ծնողը կամ ղեկավարը աշխատանքի վայրում տառապում է սխալ հասկացված լինելու պատճառով։ Եթե այո, ապա ձեռք բարձրացրեք։
ՀԱՐՑ — Ձեզանից ովքե՞ր են վերջերս սխալ հասկացվել։ Կարո՞ղ եք բարձրացնել ձեր ձեռքերը։
ՀԱՐՑ — Դուք ի՞նչ եք զգացել. որևէ մեկը կցանկանա՞ կիսվել։
ՀԱՐՑ — Ձեր թշնամիների կողմից դուք երբևիցե միտումնավոր սխալ հասկացվե՞լ եք։
Ծանուցում: Այսօրվա դասի նյութը սխալ հասկացված լինելն է։ Մենք հավատում ենք, որ Հիսուսը կատարյալ մարդ էր, ինչպես նաև՝ կատարյալ Աստված։ Եբրայեցիների գիրքն ասում է, որ Նա էլ մեզ նման ամեն տեսակ փորձվեց և գայթակղվեց։ Նա մեր «քահանայապետն» է։ Նա աղոթում է մեզ համար մեծ գթասրտությամբ, որովհետև Նա հասկանում է, թե մենք ինչերի հետ ենք առնչվում։
Մենք կյանքում առնչվում ենք սխալ հասկացված լինելու հետ, Հիսուսը նույնպես այս խնդրի հետ առնչվեց։ Եկե՛ք տեսնենք, թե Նա ինչպես վարվեց այդ ժամանակ։
III. Հոգևոր առումով կույր կրոնավոր թշնամիները․ Մարկոս 8:11-13։
Ծանուցում: Կյանքը բավականին բարդանում է, երբ մենք սխալ ենք հասկացվում, բայց ավելի զայրացնող է, երբ սխալ ենք հասկացվում նրանց կողմից, ովքեր չեն ցանկանում ճշմարտությունը տեսնել։ Երբեմն էլ մենք առնչվում ենք այնպիսների հետ, ովքեր դիտավորությամբ չեն ցանկանում ճշմարտությունը տեսնել։
>>>> Ինչ-որ մեկը թող կարդա Մարկոս 8:11-13։
Ծանուցում: Նշան փնտրելու ջանքերը, թվում է, գագաթնակետին են հասնում փարիսեցիների կողմից Հիսուսի «հարցաքննության» ավարտին։ Նրանք Իր խոսքերի ճշմարտությունը հաստատող ապացույց էին պահանջում Հիսուսից։ Թե փարիսեցիները կոնկրետ ինչի մասին էին խոսում, գրված չէ, մեզ միայն հայտնի է այն, որ որպես ապացույց՝ նրանք երկնքից (այսինքն՝ Աստծուց) նշան էին ցանկանում տեսնել։
ՀԱՐՑ — Ինչպե՞ս Հիսուսը նրանց պատասխանեց։
ՀԱՐՑ — Այսօր մեզ համար սա ի՞նչ է նշանակում։
ՀԱՐՑ — Ինչո՞ւ Հիսուսը մերժեց։ Ի՞նչ եք կարծում, ո՞րն էր Հիսուսի մերժման պատճառը։
ՊԱՏ․ — 1) Նա ենթարկված կլիներ ճշմարտության որոշման իրենց համակարգին, մի կրոնական համակարգ, որը մասամբ 7:1-23-ում Հիսուսը մերժեց։
2) Հիսուսի բժշկության մեջ նրանք արդեն բազում հրաշքներ և Աստծո զորության զարմանահրաշ դրսևորումներ էին տեսել։ Նախկին դասերում մենք տեսնում ենք, որ 3:22-ում նման հրաշագործ զորությունը կրոնականները սատանայական անվանեցին։
3) Նրանք Հիսուսին չէին հավատա, անգամ եթե Նա նրանց կանոնների համաձայն խաղար։ Եթե դուք Աստվածաշունչ ունեք ձեզ հետ, բացե՛ք Սաղմոս 95։
>>>> Ինչ-որ մեկը թող կարդա Սաղմոս 95:8-11։
ՀԱՐՑ -Արդյոք իսրայելացիները հրաշքներ և նշաններ տեսա՞ն։ Արդյո՞ք դա նպաստեց, որ նրանք հավատան։
ՊԱՏ․ — Ո՛չ, չնպաստեց նրանց հավատալուն։ Իսրայելացիները տեսան Ելք գրքում արձանգրված մեծ հրաշքները և, միևնույնն է, ընտրեցին չհավատալու ճանապարհը։
ՀԱՐՑ — Արդյո՞ք կրոնական կրթությունը միշտ է օգնում մեզ տեսնել ճշմարտությունը։
ՊԱՏ․ — Կրոնական կրթությունը դեռ երաշխիք չէ հոգևոր ճշմարիտ իմացականության ձեռքբերման։ Փարիսեցիները գիտեին իրենց աստվածաբանությունը, որի մեծ մասը նույնիսկ բարձրակարգ մտածելահամակարգ էր։
ՀԱՐՑ — Մեզանում այսօր կա՞ն նշան փնտրողներ։
ՊԱՏ․ — Ինչպես շատերը Հիսուսի օրերին, այսօր էլ կան առաջնորդներ, որ սպասում են ինչ-որ հաստատման, երբ իրենք արդեն գիտեն ճշմարտությունը, ինչպես նաև իրենց անելիքները։ Քանի որ նրանք չկամեցան անել այն, ինչ իրենք գիտեին, որ պետք է անել, նրանք սկսեցին առնչվել Աստծո լռության հետ (>>> կարդացե՛ք Մարկոս 8:12-13)։ Հիսուսը կարող է հրաժարվել որևէ նշան մեզ ցույց տալուց, որովհետև այն ինչ պետք է, մենք արդեն գիտենք։
III. Հոգևորապես կույր աշակերտները․ Մարկոս 8:14-21:
Ծանուցում: Հիսուսն իր թշնամիների կողմից սխալ էր հասկացվում, որովհետև Նրա ուսուցումը և ներկայությունը սպառնալիք էր նրանց համար։ Մենք տեսնում ենք Նրա անհանգստությունը և ապա Նրա պատասխան տալու չկամությունը, բայց հիմա ամեն ինչ ավելի զայրացուցիչ է դառնում։
ՀԱՐՑ — Դուք երբևիցե սխալ հասկացե՞լ եք ձեր ընկերներին։
ՀԱՐՑ — Արդյո՞ք երբեմն մեր սխալ հասկանալը պայմանավորված է նրանով, որ մենք սպառնալիք ենք զգում մեր անձի հանդեպ։ Կարո՞ղ եք դուք օրինակ բերել, և ի՞նչ բնույթի սպառնալիք է եղել։
>>>> Ինչ-որ մեկը թող կարդա Մարկոս 8:14-15։
ՀԱՐՑ — Աշակերտներն ի՞նչ էին մոռացել։
ՀԱՐՑ — Ինչո՞ւ աշակերտները սխալ հասկացան 8:15։
ՊԱՏ․ — Սելեկտիվ լսողություն. երեխա ժամանակ մենք հաճախ ենք այսպես վարվել մեր ծնողների հետ։ Մենք նման ձևով կարող ենք վարվել նաև Աստծո հետ։ Դուք ինքնե՛րդ նմանատիպ օրինակ բերեք։ Փոխանակ լսելու այն, ինչ իրականում ասվել է, մեր մեղքի պատճառով մենք կենտրոնանում ենք բանալի խոսքի վրա։
ՀԱՐՑ — Ի՞նչ է թթխմորը։
ՊԱՏ․ — Խմորիչ:
ՊԱՏ․ — Այսպիսով, խմորիչը այստեղ ի՞նչ է խորհրդանշում։
ՀԱՐՑ — Իրականում դա ինչ-որ բանի հոտած վիճակն է, բայց հաց և յոգուրտ պատրաստելու համար դուք պետք է ավելացնեք թթխմորից՝ որպես կատալիզատոր։
Ծանուցում: Քանի որ խմորիչը ինչ-որ հոտած կամ վատորակ բան է, թթխմորը հին աշխարհում, կարելի է ասել, կաշառակերության հոմանիշն է եղել։
ՀԱՐՑ — Ո՞րն է 8:15-ի իմաստը։
ՊԱՏ․ — Զգուշացե՛ք կրոնական առաջնորդների և քաղաքական գործիչների կոռումպացված ազդեցությունից։
>>>> Ինչ-որ մեկը թող կարդա Մարկոս 8:16:
ՀԱՐՑ — Աշակերտները հասկացա՞ն նախազգուշացումը։
>>>> Ինչ-որ մեկը թող կարդա Մարկոս 8:17-21:
ՀԱՐՑ — Ինչո՞ւ Հիսուսը նախազգուշացրեց հեռու մնալ փարիսեցիների և Հերովդեսի ուսմունքից՝ օգտագործելով հացի մետաֆորը։
ՊԱՏ․ — Հնարավոր է՝ Հիսուսը սա կապում էր երկու անգամ բազմությանը կերակրելու հրաշքների հանդեպ նրանց անհավատության հետ (6:34-44 և 8:1-10)։ Նրանք դեռ պետք է հասկանային (8:17-20)։ Հնարավոր է՝ Նա հարցը ձևակերպեց հացի շուրջ, որովհետև հացի հետ կապված դրվագների առումով աշակերտները դեռ շատ բան չէին հասկանում։ Բացի այդ, Հիսուսը շատ նկանակի կարիք չուներ տասներկու մարդ կերակրելու համար (տե՛ս 8:17-20), այլ ավելի շուտ Նա կկերակրե՛ր մարդկանց մեծ բազմություն՝ սակավ հացով։
ՀԱՐՑ — Ի վերջո, ի՞նչն անհանգստացրեց Հիսուսին։ Ինչո՞ւ Նա 8:12-ում «հոգոց հանեց»։
ՊԱՏ․ — >>> Կրկին կարդացե՛ք Մարկոս 7:34։ Հնարավոր է՝ խուլ մարդու մեջ Նա տեսավ Իր մարդկանց խլությունը, անգամ Իր իսկ աշակերտների։ Այդ մեր ֆիզիկական կարիքներն(7:34) ու հոգևոր կուրությունն (8:12) էին, որ ստիպեցին Աստծուն անհանգստանալ, որովհետև Նա մեր կյանքի նշված երկու ոլորտներով էլ մտահոգված է։
IV.Բազմության միջի ֆիզիկական կույրը․ Մարկոս 8:22-26։
>>>> Ինչ-որ մեկը թող կարդա Մարկոս 8:22-26։
ՀԱՐՑ — Ինչո՞ւ Հիսուսը մարդուն քաղաքից դուրս տարավ։
ՊԱՏ․ — 1) Նա չէր հետապնդում հայտնի դառնալու նպատակ։ Իր պարագայում սա օրինաչափորեն արտացոլվում է 1:44, 5:43, 7:36, և 8:26 հատվածներում։
2) Հնարավոր է՝ Նա նաև մտահոգված էր հենց այդ մարդու դրությամբ։
ՀԱՐՑ — Ինչո՞ւ էր բուժումն աստիճանական։ Մինչ կպատախանեք այս հարցին, հաշվի առեք, որ սա միակ աստիճանական բժշկությունն էր՝ գրանցված բոլոր ավետարաններում։
ՀԱՐՑ — Ինչո՞ւ Մարկոսը հոգևորապես կույր խմբերի (կրոնական առաջնորդների և Իր աշակերտների) երկու դրվագներից հետո է միայն արձանագրում տեսողության բժշկության մասին։ Սրանով Մարկոսն ի՞նչ է ցանկանում ասել։
ՊԱՏ․ — Հոգևոր տեսողությունը հաճախ տրվում է աստիճանաբար։ Մի՛ հուսահատվեք։ Չնայած նրանց՝ բթամիտ լինելու մեծ հակվածությանը՝ Հիսուսը նրանց փոխարեն նոր աշակերտներ չընտրեց։ Եթե դուք իրականում ցանկանում եք տեսնել, ապա Նա ձեզ կպահի։ Գործընթացը կարող է աստիճանական լինել, բայց Սաղմոս 146:8-ը ի վերջո ճմարտություն կդառնա ձեզ համար էլ։

>>>> Խմբի համար ինչ-որ մեկը թող կարդա Սաղմոս 146:8։ (Սաղմոս 146:6-10)

ԱՍՏՎԱԾԱՇՆՉՅԱՆ ՀՂՈՒՄՆԵՐ

Մարկոս 8:11-26
11 Փարիսեցիները եկան ու սկսեցին նրա հետ վիճել. նրան փորձելու համար նրանից նշան էին ուզում երկնքից։ 12 Եվ նա հոգով տրտմեց ու ասաց. «Ինչո՞ւ է այս ազգը նշան ուզում։ Ճշմարիտ եմ ասում ձեզ, որ այս ազգին այդպիսի նշան չի տրվելու»։ 13 Նրանց թողեց, դարձյալ նավ մտավ ու մյուս կողմը գնաց։
Փարիսեցիների և հերովդեսականների խմորը
(Մտթ. 16.5-12)
14 Աշակերտները մոռացել էին հաց վերցնել։ Նավում իրենց հետ մեկ հացից բացի ուրիշ ոչինչ չունեին։ 15 Հիսուսը պատվիրեց նրանց ու ասաց. «Զգուշացե՛ք փարիսեցիների ու հերովդեսականների խմորից»։ 16 Աշակերտները մտածում էին և իրար մեջ ասում. «Քանի որ հաց չունենք, դրա համար է այդ ասում»։ 17 Հիսուսը հասկացավ և նրանց ասաց. «Ինչո՞ւ եք մտածում, թե հաց չունեք։ Դեռ չե՞ք հասկանում և չե՞ք հիշում. ձեր սիրտն այդքան ընդարմացա՞ծ է։ 18 Աչք ունեք և չե՞ք տեսնում, ականջ ունեք և չե՞ք լսում ու չե՞ք հիշում։ 19 Երբ այն հինգ հացը հինգ հազար մարդու համար կտրեցի, դրանց կտորներից քանի՞ կողով լիքը վերցրիք»։ Նրան ասացին. «Տասներկու»։ 20 «Իսկ երբ յոթ հացը չորս հազար մարդու համար կտրեցի, դրանց կտորների՞ց քանի զամբյուղ լիքը վերցրիք»։ Նրանք ասացին. «Յոթ»։ 21 Նրանց ասաց. «Հապա ինչպե՞ս չեք հասկանում»։
Կույրի բժշկումը
22 Եկան Բեթսայիդա. նրա առաջ բերեցին մի կույրի ու խնդրում էին, որ դիպչի նրան։ 23 Հիսուսը կույրի ձեռքից բռնեց, գյուղից դուրս տարավ։ Նրա աչքերին թքելով ու ձեռքով դրանց դիպչելով՝ նրան հարցրեց, թե որևէ բան տեսնո՞ւմ է։ 24 Նա նայեց ու ասաց. «Տեսնում եմ մարդկանց, որոնք քայլող ծառերի նման են»։ 25 Հետո դարձյալ ձեռքերը նրա աչքերի վրա դրեց և նրան հստակ տեսնել տվեց։ Նրա տեսողությունը վերականգնվեց, և բոլորին պարզ տեսնում էր։ 26 Հիսուսը նրան տուն ուղարկեց՝ ասելով. «Ո՛չ գյուղ կմտնես, ո՛չ էլ գյուղում մեկին կասես»։

Մարկոս 7:1-23
Վեճ նախնիների ավանդույթի շուրջ
(Մտթ. 15.1-9)
1 Փարիսեցիներն ու դպիրներից ոմանք, որ Երուսաղեմից էին եկել, նրա շուրջը հավաքվեցին։ 2 Եվ երբ տեսան, որ նրա աշակերտներից մի քանիսը անմաքուր ձեռքերով, այսինքն՝ առանց լվացվելու, հաց են ուտում, հանդիմանեցին նրանց։ 3 Որովհետև փարիսեցիներն ու բոլոր հրեաները, եթե նախօրոք ձեռքերը չեն լվանում, չեն ուտում՝ այդ կերպ պահպանելով նախնիների ավանդույթը։ 4 Ինչպես նաև շուկայից վերադառնալուց հետո չեն ուտում, մինչև նախ չլվացվեն։ Շատ այլ ավանդույթներ էլ են պահպանել, ինչպես բաժակների, անոթների, պղնձե ամանների ու անկողինների լվացումը։ 5 Արդ, փարիսեցիներն ու դպիրները հարցրին Հիսուսին. «Ինչո՞ւ քո աշակերտները նախնիների ավանդույթով չեն առաջնորդվում, այլ անլվա ձեռքերով են հաց ուտում»։
6 Նա պատասխանեց նրանց ու ասաց. «Եսային լավ է մարգարեացել ձեր՝ կեղծավորներիդ մասին՝ ասելով.
“Այս ժողովուրդն ինձ շրթունքներով է պատվում,
իսկ նրա սիրտն ինձանից շատ հեռու է։
7 Զուր են պաշտում ինձ,
քանի որ ուսուցանում են պատվիրաններ,
որոնք մարդիկ են հորինել” (Ես. 29.13)։
8 Աստծու պատվիրանները թողած՝ մարդկանց ավանդույթներն եք պահում։ Անոթների* ու ամանների լվանալը և սրա նման ուրիշ շատ այլ բաներ եք անում»։ 9 Եվ նրանց ասաց. «Շա՜տ լավ. ուրեմն Աստծու պատվիրանը անարգում եք, որ ձեր ավանդույթը պահպանեք։ 10 Որովհետև Մովսեսն ասել է՝ “Պատվի՛ր հորդ ու մորդ” (Ելք 20.12, Բ Օր. 5.16) և “Ով իր հորը և մորը չարախոսի, թող մահով պատժվի” (Ելք 21.17, Ղևտ. 20.9)։ 11 Բայց դուք ասում եք. “Եթե մեկը հորը կամ մորն ասի՝ Կորբան, (որ նշանակում է “Այն օգնությունը, որ ինձանից ստանալու էիր, Աստծուն է տրված”), 12 և նրան իր հոր կամ մոր համար որևէ բան անելու պարտականությունից ազատում եք”։ 13 Եվ Աստծու խոսքը անարգում եք ձեր ավանդույթով, որ ժառանգել եք։ Ու սրա նման ուրիշ շատ բաներ էլ եք անում»։
Մաքուրը և անմաքուրը
(Մտթ. 15.10-20)
14 Եվ ամբողջ ժողովրդին դարձյալ իր մոտ կանչելով՝ ասաց. «Բոլորդ ի՛նձ լսեք ու հասկացե՛ք. 15 դրսից մարդու մեջ մտնող ոչ մի բան չի կարող նրան պղծել, այլ նրանից դուրս եկող բաներն են, որ պղծում են մարդուն։ 16 * Ով լսելու ականջ ունի, թող լսի»։
17 Երբ Հիսուսը ժողովրդից հեռացավ ու տուն մտավ, նրա աշակերտներն այն առակի մասին հարցրին նրան։ 18 Եվ նա ասաց նրանց. «Դուք է՞լ այդքան անմիտ եք, չգիտե՞ք, որ այն ամենը, ինչ դրսից է մարդու մեջ մտնում, չի կարող նրան պղծել, 19 որովհետև նրա սրտի մեջ չի մտնում, այլ որովայնի, և դուրս է գնում արտաքնոց՝ ամբողջ կերածը մաքրելով»։ 20 Նա նաև ասաց. «Այն, ինչ դուրս է գալիս մարդու միջից, դա է պղծում մարդուն։ 21 Որովհետև մարդկանց սրտի միջից դուրս են գալիս չար մտքեր, պոռնկություն, գողություններ, սպանություններ, 22 շնություններ, ագահություն, չարություններ, նենգություն, գիջություն, նախանձ, հայհոյություն, ամբարտավանություն, անզգամություն։ 23 Այս բոլոր չարիքները ներսից են դուրս գալիս ու պղծում մարդուն»։

Մարկոս 6: 34-44
34 Երբ Հիսուսը ցամաք ելավ, մեծ բազմություն տեսավ. գթաց նրանց, որովհետև հովիվ չունեցող ոչխարների էին նման։ Եվ սկսեց նրանց շատ բաներ ուսուցանել։ 35 Երբ արդեն շատ ժամանակ էր անցել, աշակերտները մոտեցան նրան և ասացին. «Այս վայրն ամայի է, և ուշ ժամ է։ 36 Ժողովրդին արձակի՛ր, որ շրջակա ագարակներն ու գյուղերը գնան հաց առնելու, որովհետև այստեղ ուտելու բան չունեն»։ 37 Նա պատասխանեց նրանց ու ասաց. «Դո՛ւք դրանց ուտելիք տվեք»։ Այդժամ նրան ասացին. «Գնանք երկու հարյուր դինարի հաց առնենք ու նրանց տանք, որ ուտե՞ն»։ 38 Իսկ նա հարցրեց նրանց. «Քանի՞ հատ հաց ունեք։ Գնացե՛ք ու տեսե՛ք»։ Երբ իմացան, նրան ասացին. «Հինգ հաց և երկու ձուկ»։ 39 Այդ ժամանակ նրանց կարգադրեց, որ բոլորին խումբ-խումբ նստեցնեն դալար խոտի վրա։ 40 Եվ նրանք դաս-դաս նստեցին՝ հարյուր-հարյուր և հիսուն-հիսուն։ 41 Հիսուսը վերցրեց հինգ հացն ու երկու ձուկը, դեպի երկինք նայեց, դրանք օրհնեց, հացերը մասերի բաժանեց ու աշակերտներին տվեց, որ նրանց բաժանեն։ Այն երկու ձկները նույնպես բոլորին բաժանեց։ 42 Բոլորն էլ կերան ու կշտացան։ 43 Հացի ու ձկան կտորներից հավաքեցին նաև տասներկու լիքը կողով։ 44 Նրանք, որ հաց կերան, մոտ հինգ հազար տղամարդ էին։

Սաղմոս 95:8-11
8 Մի՛ խստացրեք ձեր սրտերը, ինչպես Մերիբայի մեջ, ինչպես փորձության օրը՝ անապատի մեջ,
9 Որտեղ ձեր հայրերը փորձեցին ինձ, քննեցին ինձ, թեև տեսան իմ գործերը։
10 Քառասուն տարի զզվեցի այդ սերնդից և ասացի. «Նրանք մի այնպիսի ժողովուրդ են, որ մոլորված են սրտով. նրանք չեն ճանաչում իմ ճանապարհները»,
11 Ուստի իմ բարկության պահին երդվեցի, որ նրանք չեն մտնի իմ հանգստությունը։

Մարկոս 8:1-10
Հացի երկրորդ բազմացումը
(Մտթ. 15.32-39)
1 Այն օրերին, երբ դարձյալ շատ ժողովուրդ էր հավաքվել, և ուտելու բան չունեին, Հիսուսն իր աշակերտներին կանչեց ու նրանց ասաց. 2 «Այս ժողովրդին խղճում եմ, որովհետև արդեն երեք օր է՝ ինձ մոտ են և ուտելու ոչինչ չունեն։ 3 Եթե նրանց քաղցած արձակեմ իրենց տները, ճանապարհին կնվաղեն, քանի որ ոմանք հեռվից են եկել»։ 4 Աշակերտները պատասխանեցին նրան. «Ինչպե՞ս կարելի է այս ամայի վայրում նրանց հացով կշտացնել»։ 5 Հիսուսը հարցրեց նրանց. «Քանի՞ հաց ունեք»։ Նրանք պատասխանեցին՝ յոթ։ 6 Հիսուսը ժողովրդին հրամայեց, որ գետնին նստեն։ Եվ վերցրեց այն յոթ հացը, գոհություն հայտնեց, մասերի բաժանեց և իր աշակերտներին տվեց, որ բաժանեն. նրանք էլ բաժանեցին ժողովրդին։ 7 Ունեին նաև մի քանի փոքր ձկներ. նա օրհնեց ու ասաց, որ դրանք էլ բաժանեն։ 8 Կերան ու կշտացան. և յոթ զամբյուղ էլ ավելացած կտորներ հավաքեցին։ 9 Մոտ չորս հազար մարդ կար։ Ապա Հիսուսը նրանց արձակեց 10 և աշակերտների հետ իսկույն նավ մտավ ու Դաղմանութայի կողմերը եկավ։

Մարկոս 7:34
34 Հիսուսը դեպի երկինք նայեց, հառաչեց ու նրան ասաց. «Եփփա՛թա», որ նշանակում է «Բացվի՛ր»։

Մարկոս 1:44
43 Եվ նրան անմիջապես դուրս հանելով՝ հորդորեց ու 44 ասաց. «Զգո՛ւյշ կաց, ոչ ոքի ոչինչ չասես, այլ գնա՛, քեզ ցո՛ւյց տուր քահանային ու քո մաքրվելու համար մատուցի՛ր այն, ինչ Մովսեսն է հրամայել՝ որպես դրա վկայություն»։

Մարկոս 5:43
43 Հիսուսը նրանց խստիվ պատվիրեց, որ ոչ ոք դրա մասին չիմանա, և ասաց, որ նրան ուտելու բան տան։

Մարկոս 7:36
36 Հիսուսը նրանց պատվիրեց, որ ոչ ոքի չասեն. սակայն ինչքան էլ նա պատվիրում էր նրանց, այնքան նրանք ավելի էին տարածում։ 37 Չափազանց զարմանում էին ու ասում. «Սա ամեն բան լավ է անում. խուլերին լսել է տալիս, համրերին՝ խոսել»։
Սաղմոս 146:6-10
6 Որ ստեղծեց երկինքն ու երկիրը, ծովը և նրանց մեջ եղած ամեն ինչ. որ հավատարմություն է պահում հավիտյան.
7 Իրավունք է շնորհում զրկվածներին և հաց է տալիս սովածներին, Տերը արձակում է կապվածներին։
8 Տերը բացում է կույրերի աչքերը, Տերը կանգնեցնում է ընկածներին, Տերը սիրում է արդարներին։
9 Տերը պահում է պանդուխտներին. նա ընդունում է որբերին և որբևայրիներին, բայց ծռում է ամբարիշտների ճանապարհը։
10 Տերը պիտի թագավորի հավիտյան. քո Աստվածը, ո՛վ Սիոն, ազգից մինչև ազգ։ Ալելուիա՜։