ՄԱՐԿՈՍ 10:46-52 ԴԱՍ # 29
ԱՍՏԾՈՒՆ ՀԱՍՆԵԼԸ

I. Ողջույնի խոսք:
II. Ներածություն:
Ծանուցում: Հաճախ մենք ստիպված ենք լինում առերեսվել բաների հետ, որ այնքան էլ մեզ դուր չեն գալիս. նոր աշխատանք, նոր դպրոց, առաջիկա քննություններ, առաջիկա վիրահատություններ, այցելություն ատամնաբույժի և այլն։ Որոշ բաներից մենք հաճախ սարսափում ենք, երբ գիտենք, որ մոտակա ապագայում են կատարվելու։ Մեր կյանքի այս ասպեկտը Հիսուսը լավ է հասկանում և համապատասխան օգնություն է ցուցաբերում՝ մեր սարսափները հաղթահարելու համար։
>>>> Ինչ-որ մեկը թող կարդա Մարկոս 10:46 և Մարկոս 11:1։
ՀԱՐՑ — Երիքովից հեռանալուց հետո Հիսուսն ո՞ւր էր գնում։
ՊԱՏ. — Երուսաղեմ։ Երուսաղեմի և Երիքովի միջև ոչինչ չկար, բացի ամայի ճանապարհից։
ՀԱՐՑ — Ժամանելուց հետո ի՞նչ եղավ Իր հետ։
ՊԱՏ. — Հիսուսը գիտեր, որ Իրեն նվաստացում և խաչելություն էր սպասվում։ Մարկոսը հինգ անգամ մատնանշում է 8-10-րդ գլուխներում, որ Հիսուսը գիտակցում էր Իր գալիք խաչելությունը։ Հիսուսը գիտեր, թե ուր է գնում և ինչի հետ է առնչվելու, և պետք է որ ինչ-որ չափով վախ զգար։
ՀԱՐՑ — Ինչ-որ բան կա՞, որից դու սարսափում ես այսօր։
ՊԱՏ. — Գրի՛ առեք 3×5 չափսի քարտի վրա: Դրանք հենց հիմա բաժանվում են։ Եթե հիմա ձեր մտքին ոչինչ չի գալիս, պահեք քարտը. հնարավոր է, հետո՝ դասի ընթացքում, ցանկանաք ինչ-որ բան գրել։
III. Երիքովից դուրս առաջին շփումը. կույր մարդը և ամբոխը։ Մարկոս 10:47-48։
>>>> Ինչ-որ մեկը թող կարդա Մարկոս 10:47-48:
ՀԱՐՑ — Ինչո՞ւ ամբոխը լռեցրեց կույր մարդուն։ Այն պատճառո՞վ, որ նա ձանձրալի ու նյարդերի վրա ազդող մարդ էր, թե՞ որ նա Հիսուսին մեսիայի կոչումով էր դիմում։
ՊԱՏ. — Երկու պատճառն էլ հնարավոր է, բայց ավելի հավանական է առաջին պատճառը։
ՀԱՐՑ — Կույր մարդու բնավորությունից մենք ի՞նչ ենք սովորում։
ՊԱՏ. — Նա վճռական էր, համառ և հանդուգն։ Վերջիններս աղոթքի համար գերազանց հատկություններ են։
ՀԱՐՑ — Վճռականությունն անհրաժե՞շտ է Աստծուն հասնելու համար։
Ծանուցում: «Ողորմի՛ր ինձ» արտահայտությունը Սաղմոսների գրքից պաղատանք է։ Թող երեք տարբեր մարդիկ բացեն հետևյալ երեք սաղմոսները. Սղ. 4:1; Սղ. 6:2; Սղ. 51:1
>>>> Թող մասնակիցները կարդան Սաղմոս 4:1; 6:2; և 51:1։
Այս երեք հատվածները բարձրաձայն կարդալուց հետո կարող եք խրախուսել նրանց ավելի ուշ ինքնուրույն կարդալ ամբողջ սաղմոսը: Սաղմոս 4-ը ողորմության աղաղակ է՝ անգութ, զորեղ մարդկանց պատճառով, 6-րդ սաղմոսը ֆիզիկական հիվանդության համար ողորմության աղաղակ է, և Սաղմոս 51-ը կապված է այն կարիքի հետ, որն առաջ է գալիս մեր սեփական մեղքի պատճառով: Սաղմոսներում բոլոր երեքն էլ ոչ այլ ինչ են, եթե ոչ սառցաբեկորի գագաթի ծայրը, որտեղ Իսրայելին ուսուցանվել էր աղաղակել արարչագործության ճշմարիտ Աստծուն, որովհետև Աստված հետաքրքրված էր նրանց աղաչանքով։
Ծանուցում: Միգուցե «Դավթի որդի» տիտղոսը մեսիական էր։ Կույր մարդը, հնարավոր է, ընկալել էր Հիսուսին որպես գործիք՝ Դավիթյան հույսի։ Թող բոլորը բացեն Եսայի 35:4-6։
>>>> Ինչ-որ մեկը թող կարդա Ես. 35:4-6։
IV. Երիքովից դուրս երկրորդ շփումը. Հիսուսը, մարդկանց բազմությունը և կույր մարդը։ Մարկոս 10:49։
>>>> Ինչ-որ մեկը թող կարդա Մարկոս 10:49:
ՀԱՐՑ — Ի՞նչ տարբերություն կար 10:48-ում բազմության արձագանքում։
ՊԱՏ. — Ամբոխը երկակի էր ներգրավված. Մարկոս 10:48 և 49։ Ամբոխը կարող է անկայուն լինել և փոխվել։ 10:48 -ում նրանք մարդուն թույլ չէին տալիս Հիսուսին անհատապես հանդիպելու, մինչդեռ 10:49 -ում նրանք խրախուսում էին անհատական հանդիպումը։ Նման հեղհեղուկության Հիսուսը շուտով կառնչվի Երուսաղեմում։ Ամբոխը կտրուկ փոխվեց Ծաղկազարդի կիրակիից հինգ օր անց՝ փառաբանության կոչերից անցնելով Հիսուսին խաչելու կոչերին։
V. Երիքովից դուրս երրորդ շփումը: Հիսուսը և կույր մարդը։ Մարկոս 10:50-52։
>>>> Ինչ-որ մեկը թող կարդա Մարկոս 10:50-52։
Ծանուցում: Հիսուսը կարծես թե ցանկանում է անձամբ գործ ունենալ այս մարդու հետ: Սա էր Հիսուսի գործելաոճը. Մարկոս 2.5-11; 5: 30-34; 7: 27-29; 9: 21-24: Միգուցե «անձայն ուղղաթիռի» օրինակը մեզ կօգնի: Եթե դուք անձայն ուղղաթիռ ունենայիք և կարողանայիք անաղմուկ սավառնել Հիսուսի և ամբոխի գլխավերևում և միևնույն ժամանակ մարդկանց՝ Հիսուսին իրապես մոտ լինելու չափիչ սարք ունենայիք, ապա դուք ինչ-որ բան կնկատեիք Հիսուսի ծառայության մեջ: Քանի դեռ մարդիկ ամբոխի հետ էին՝ ոչ մի իրական հոգևոր արդունք չէին ցուցաբերում։ Մարդը պետք է Հիսուսի հետ առանձնանար ամբոխից՝ արդյունքի հասնելու համար։ Մեզանից շատերը այսօր իրականում Աստծուն մոտ չեն, և մենք գիտենք այս մասին։ Սա այն պատճառով է, որ մենք կամք չենք ցուցաբերում ամբոխից, մեր կրոնական խմբից կամ գոռոզ ընկերներից հեռանալու։ Մենք նախընտրում ենք մնալ ամբոխի մեջ ապահով։ Եթե մենք շարունակենք մնալ ամբոխի մեջ, ապա Աստծո և Հիսուսի հետ իրական շփումից հեռո՛ւ կմնանք։
Ծանուցում: Հիսուսը չբուժեց այդ մարդուն ուղղակի նրա կողքով անցնելու ժամանակ. նա դադար տվեց և անհատական շփում նախընտրեց։ Նա ցանկացավ անհատապես շփվել այդ մարդու հետ։
ՀԱՐՑ — Ինչո՞ւ Հիսուսը կույր մարդուն հարցրեց, թե վերջինս ի՞նչ է ցանկանում։ Ակնհայտ չէ՞ր, որ նա ցանկանում էր կուրությունից բժշկվել։
ՊԱՏ. — Երբեմն Աստված ցանկանում է, որ մենք խոսենք մեր ցանկությունների մասին։ Ուշադրություն դարձրեք, որ մարդն ընդհանուր ողորմության կանչը (10:47-48) փոխարինեց կոնկրետ կուրությունից բժշկվելու պահանջով։
Ծանուցում: Երեք շփումներն էլ ցույց են տալիս, որ կույր մարդը ագրեսիվ էր։
ՀԱՐՑ — Նմանատիպ ագրեսիվությունն աշխատե՞ց։
ՊԱՏ. — Այո, ուշադրությո՛ւն դարձրեք, որ մարդը չխնդրեց Իսրայելի փրկության համար կամ այլ հոգևոր արժեքավոր բաներ։ Նա խնդրեց այն, ինչն իրականում ամենաշատ ազդեցությունն ուներ իր կյանքի և մտածելակերպի վրա։ Թերևս կույր մարդը օրինակ կարող է հանդիսանալ մեզ համար, թե ինչպես սկսել մեր աղոթքները։
ՀԱՐՑ — Հիսուսը նո՞ւյնպես ագրեսիվ էր։
ՊԱՏ. — Կույր մարդը համառ էր, բայց Հիսուսը՝ առավել ևս։ Նա հարկադրեց (10:51) կույր մարդուն արձագանքել։ Արդյո՞ք այս պատմությունը ճշմարտության օրինակ է, որ անկախ նրանից, թե որքան համառ ենք մենք, Նա ավելի շատ համառ կլինի:
>>>> Նորի՛ց կարդացեք Մարկոս 10:51։
ՀԱՐՑ — Կույր մարդն ի՞նչ էր ցանկանում։
ՊԱՏ. — Նա ցանկանում էր տեսնել։ Ուշադրությո՛ւն դարձրեք երկու բանի վրա։ Նա դադարեց շքեղ տիտղոսներ օգտագործել Հիսուսի հասցեին։ Նա չօգտագործեց մեսիական տիտղոս, այլ ավելի պարզ տիտղոս՝ Րաբբի։ Այդ մարդն ուղղակի և համեստորեն արտահայտեց իր ցանկությունը։
Ծանուցում: Հիշե՛ք, աչքերն ընկալման մետաֆոր են Աստվածաշնչում: Տեսնելու համար մենք պետք է աչք ունենանք։ Ես հասկացել եմ, որ եթե մենք խնդրենք, որ մեր աչքերը բացվեն, մենք կսկսենք տեսնել: Ես զարմացած եմ:
ՀԱՐՑ — Կույր մարդն արդյ՞ոք խնդրեց մի բան, որ կարող էր ինքն էլ անել։
ՊԱՏ. — Ոչ, նա հրաշք խնդրեց: Նա ցանկանում էր տեսնել: Մարդը չէր կարող սեփական ուժերով այդ հրաշքն իրականացնել: Նա աստվածային օգնության կարիք ուներ: Եթե Հիսուսն ուղղակի լավ խորհրդատու և բարի մարդ լիներ, ապա այդ մարդուն չէր կարողանա օգնել: Կույրին անհրաժեշտ էր մի բան, որը սեփական ուժերով անհնար էր իրացնել: Այդտեղ Աստծո միջամտություն էր պետք
VI. Ամփոփում: Ի վերջո, վերադառնանք այնտեղ, որտեղից սկսեցինք: Հիսուսն Իր մահվան ճանապարհին էր, բայց նույնիսկ այս դեպքում նա ժամանակ ունեցավ ուշադրություն դարձնելու կարիքավորներից մեկին: Հաջորդ անգամ, երբ մենք սթրեսի մեջ կլինենք, եկե՛ք մեր ճանապարհին փնտրենք Բարտիմեոսին: Սա էր Հիսուսի գործելաոճը․ տե՛ս Մարկոս 10:13: Սա էր Նրա գործելաոճը ողջ ավագ շաբաթվա ընթացքում: Խաչի վրա Նա դարձի բերեց գողին, Իր մորը նոր որդի տվեց (Հովհաննեսի ավետարանում), օգնեց իր աշակերտներին փախչել և այլն: Իր զգացմունքների հետ Հիսուսը շարունակաբար անկեղծ էր, բայց երբեք չմոռացավ նայել Իր սեփական վշտից և կարիքից վեր՝ Իրեն շրջապատող այլ մարդկանց կարիքներին։
ՀԱՐՑ — Ինչի՞ց եք դուք վախենում այս շաբաթ։
ՊԱՏ. — 1) Գրառե՛ք այն ամենն, ինչ կհիշեք այս դասի ընթացքում և ինչի հետ, հնարավոր է, դուք հիմա առնչվում եք։
2) Հիշե՛՛ք, սովորեք ձեր սեփական խնդիրները մի կողմ դնել, ինչպես Հիսուսն արեց, և ձեր խնդիրներից վեր նայել։ Փնտրե՛ք ձեր կյանքի Բարտիմեոսին։
3) Ձեր գրառումներին ավելացրե՛ք որևէ Բարտիմեոսի անուն, որ այս պահին գալիս է ձեր մտքին։ Շաբաթվա ընթացքում նոր Բարտիմեոսներ ավելացրեք արդեն ցանկին։
4) Աստված, հնարավոր է, չվերացնի ձեր կյանքի ճանապարհից այն, ինչից դուք սարսափում եք, բայց Նա կարող է օգտագործել ձեզ ուրիշներին օգնելու և նույնիսկ ուրիշների համար հրաշքներ գործելու համար։

ԱՍՏՎԱԾԱՇՆՉՅԱՆ ՀՂՈՒՄՆԵՐ

Մարկոս 10:46-52
Երիքովցի կույրի բժշկումը
(Մտթ. 20.29-34, Ղուկ. 18.35-43)
46 Եկան Երիքով։ Երբ Հիսուսն իր աշակերտների ու մեծ բազմության հետ Երիքովից դուրս էր գալիս, Տիմեի որդին՝ կույր Բարտիմեոսը, ճանապարհին նստած, մուրում էր։ 47 Երբ լսեց, որ Հիսուս Նազովրեցին է անցնում, սկսեց աղաղակել ու ասել. «Որդի՛ Դավթի, Հիսո՛ւս, ողորմի՛ր ինձ»։ 48 Շատերը նրան սաստում էին, որ լուռ մնար, բայց նա է՛լ ավելի էր աղաղակում. «Որդի՛ Դավթի, ողորմի՛ր ինձ»։ 49 Հիսուսը կանգնեց ու ասաց, որ նրան կանչեն։ Կույրին կանչեցին ու ասացին նրան. «Քաջալերվի՛ր, վե՛ր կաց, քեզ կանչում է»։ 50 Նա իր վերնազգեստը դեն գցեց, վեր կացավ ու Հիսուսի մոտ եկավ։ 51 Հիսուսը նրան հարցրեց. «Ի՞նչ ես ուզում, որ քեզ համար անեմ»։ Կույրը պատասխանեց նրան. «Ռաբբո՛ւնի, ուզում եմ տեսնել»։ 52 Հիսուսը նրան ասաց. «Գնա՛, քո հավատը քեզ փրկեց»։ Եվ նրա տեսողությունն իսկույն վերականգնվեց, ու հետևեց Հիսուսին։

Մարկոս 11:1
1 Երբ մոտեցան Երուսաղեմին, Բեթփագեին ու Բեթանիային՝ Ձիթենյաց լեռան մոտ, Հիսուսն իր աշակերտներից երկուսին ուղարկեց

Սղ․ 4:1
1 Երբ կանչեմ, լսի՛ր ինձ, ո՛վ իմ արդարության Աստված. նեղության մեջ ազատեցիր ինձ, ողորմի՛ր ինձ և լսի՛ր իմ աղոթքը։

Սղ. 6:2
2 Ողորմի՛ր ինձ, Տե՛ր, որովհետև տկար եմ ես. բժշկի՛ր ինձ, Տե՛ր, որովհետև ցնցվում եմ մինչև ոսկորներս։

Սղ. 51:1
1 Ողորմի՛ր ինձ, Աստվա՛ծ, քո ողորմության համեմատ և քո մեծ գթությամբ ջնջի՛ր իմ հանցանքները։

Ես․ 35:4-6
4 Ասացե՛ք թուլասիրտներին. «Ո՛ւժ առեք, մի՛ վախեցեք. ահա ձեր Աստվածը գալիս է վրեժխնդրությամբ, Աստծու հատուցումով. գալիս է և կազատի ձեզ»։ 5 Այն ժամանակ կբացվեն կույրերի աչքերը, կբացվեն խուլերի ականջները։

Մարկոս 2.5-11
5 Հիսուսը, նրանց հավատը տեսնելով, անդամալույծին ասաց. «Որդյա՛կ, քո մեղքերը քեզ ներված են»։ 6 Դպիրներից ոմանք նստած էին այնտեղ և իրենց մեջ մտածում էին. 7 «Ինչպե՞ս է սա այդպես խոսում. հայհոյում է։ Ո՞վ կարող է մեղքերին թողություն տալ, եթե ոչ միայն մեկը՝ Աստված»։ 8 Եվ Հիսուսն իսկույն իր հոգում իմացավ, որ իրենց մտքում այդպես են մտածում, և նրանց ասաց. «Ինչո՞ւ եք ձեր մտքում նման բաներ մտածում։ 9 Ո՞րն է հեշտ. անդամալույծին ասել՝ “Քո մեղքերը ներված են քեզ”, թե՞ ասել՝ “Վե՛ր կաց, մահիճդ վերցրո՛ւ և քայլի՛ր”։ 10 Բայց որպեսզի իմանաք, որ Մարդու Որդին երկրի վրա մեղքերին թողություն տալու իշխանություն ունի (անդամալույծին ասաց), 11 ասում եմ քեզ՝ վե՛ր կաց, մահիճդ վերցրո՛ւ, քո տո՛ւն գնա»։

Մարկոս 5: 30-34
30 Հիսուսն էլ միևնույն ժամանակ իր ներսում զգաց, որ իրենից զորություն դուրս եկավ։ Նա դեպի բազմությունը դարձավ ու ասաց. «Իմ հագուստին ո՞վ դիպավ»։ 31 Նրա աշակերտներն ասացին նրան. «Տեսնում ես, որ բազմությունը քեզ նեղում է, և հարցնում ես՝ “Իմ հագուստին ո՞վ դիպավ”»։ 32 Բայց նա շուրջն էր նայում, որ այդ բանն անողին տեսնի։ 33 Այդժամ կինը, իմանալով այն, ինչ իրեն պատահեց, վախեցած ու դողալով եկավ, նրա առաջ ընկավ և ամբողջ ճշմարտությունն ասաց նրան։ 34 Հիսուսն ասաց նրան. «Դո՛ւստր, քո հավատը քեզ փրկեց. գնա՛ խաղաղությամբ ու քո հիվանդությունից բժշկվա՛ծ եղիր»։

Մարկոս 7: 27-29
27 Սակայն Հիսուսը նրան ասաց. «Նախ թող երեխաները կշտանան, որովհետև լավ չէ երեխաների հացն առնել ու շներին գցել»։ 28 Իսկ կինը պատասխանեց ու ասաց նրան. «Այո՛, Տե՛ր, որովհետև շներն էլ երեխաների՝ սեղանից թափած փշրանքներով են կերակրվում»։ 29 Եվ Հիսուսը նրան ասաց. «Այդ խոսքիդ համար գնա՛, դևը քո աղջկա միջից դուրս ելավ»։

Մարկոս 9: 21-24
։ 21 Հիսուսը նրա հորը հարցրեց. «Որքա՞ն ժամանակ է նրան այս պատահել»։ Նա ասաց. «Մանկությունից. 22 շատ անգամ նրան նաև կրակի ու ջրի մեջ է գցել, որ կորստյան մատնի։ Բայց եթե կարող ես մի բան անել, գթա՛ մեզ և օգնի՛ր»։ 23 Հիսուսը նրան ասաց. «Եթե կարող ես հավատալ. հավատացողի համար ամեն ինչ հնարավոր է»։ 24 Այդժամ տղայի հայրն աղաղակեց ու արտասուքով ասաց. «Հավատում եմ, Տե՛ր, օգնի՛ր իմ անհավատությանը»։

Մարկոս 10:13
13 Հիսուսի մոտ երեխաների էին բերում, որ օրհնի նրանց, բայց աշակերտները սաստում էին բերողներին։