ՄԱՐԿՈՍ 12:1-12 ԴԱՍ # 33
ՄԵՐԺՎԱԾ ՔԱՐԸ

I. Ողջույնի խոսք:
II. Ներածություն:
ՀԱՐՑ — Փոքր ժամանակ մերժվելիս դուք ինչպե՞ս եք ձեզ զգացել։
ՀԱՐՑ — Ինչպիսի՞ վրեժ եք ցանկացել լուծել մերժված ժամանակ։
ՀԱՐՑ — Իսկ ավելի լուրջ՝ ինչպե՞ս եք դուք վարվում այն մարդկանց հետ, ովքեր հոգևոր առումնով կույր են և մերժում են ճշմարտությունը։
ՊԱՏ․ — Հեշտ է նման մարդկանցից պարզապես ձեռք քաշել, բամբասել նրանց մասին կամ վատը խոսել, բայց Հիսուսն այլ կերպ վարվեց։ Նա ճիշտ վարվեց։
Ծանուցում: Այսօր մենք քննարկելու ենք Հիսուսի առակներից մեկը, որը պատմվել է անմիջապես կրոնական առաջնորդների հետ վիճաբանությունից հետո։ Նրա այս կարճ խոսքը խիզախ քայլ էր։ Նա պատրաստվում էր հակադրվել նրանց, ովքեր մերժեցին իրեն, և դա անելու էր ագրո-բիզնեսից օրինակ բերելով։
>>>>Ինչ-որ մեկը թող կարդա Մարկոս 12:1:
ՀԱՐՑ — Ինչո՞ւ Հիսուսն առակներով խոսեց: Ինչո՞ւ Նա ուղիղ չասաց այն, ինչ մտածում էր:
ՊԱՏ. — Ուշադի՛ր լսեք և գրի՛ առեք նրանց պատասխանները և ավելացրե՛ք հետևյալը (եթե իհարկե իրենք այս թեման արդեն չեն արծարծել).
1) «Առակներում ճշմարտությունը կոնկրետ պատկերներով է արտահայտվում, այլ ոչ թե աբստրակցիայով»։ Քանի որ մենք կարող ենք պատկերացնել պատմությունների սիմվոլները, ապա հեշտությամբ կարող ենք տեսնել մեզ այդ պատմության մեջ (Լեյն, էջ 149)։
2) Պատմությունները արթնացնում են մարդու երևակայությունը և ստիպում լսողներին ներգրավվել։
3) Հիսուսն օգտագործում էր բնական կյանքի փորձառությունները, որոնք կարող էին ցույց տալ Իր Փրկության ծրագիրը։ Բանն այն է, որ երկուսն էլ՝ բնության մեր փորձառությունը (այս կյանքում մեր գոյությունը) և Աստծո արքայությունը սկիզբ են առնում Աստծուց (Լեյն, էջ 151)։
4) Պատմությունները կարող են մեզ վրա շատ խորը ազդեցություն թողնել, երբ մենք թուլացնում ենք մեր պաշտպանողական ռեակցիաները։
Ծանուցում: Մենք կտեսնենք, որ պատմությունը, որ Հիսուսն օգտագործում է, բիզնեսի մասին է, հատկապես՝ ագրո-բիզնեսի: Հիսուսն ընտրեց տնտեսության, ֆինանսների և բիզնեսի ոլորտից պատմություններ: Այս պատմությունը արտացոլում էր Հիսուսի ժամանակներում սովորական ագրո-բիզնեսի կազմակերպում-նախագծումը, սակայն նմանoրինակ իրավիճակներ մեր օրերում դեռևս հաճախակի են հանդիպում:
Հիսուսի օրերին մեծ տարածքով հող ուներ սեփականատերը, որը սակայն այդտեղ չէր լինում: Սեփականատերերը կամ օտարերկրացիներ էին, ովքեր պաղեստինյան հող էին գնել ներդրումների համար, կամ էլ հրեաներ էին, ովքեր սեփականել էին հողատարածքը, բայց ուրիշ վայրում էին ապրում:
III. Մշակների առակը․ Մարկոս 12:1-8։
Ծանուցում: Նախքան մենք կկարդանք այն մասին, թե Հիսուսն ինչպես փորձեց կույր կրոնական առաջնորդներին արթնացնել, եկե՛ք նախ կարդանք մի հին պատմություն, հնագույն նույնիսկ Հիսուսի օրերի համար, այն պատմվել էր Հիսուսի ծնունդից 600 տարի առաջ, Եսայի մարգարեի կողմից։
>>>> Ինչ-որ մեկը թող կարդա Եսայի 5:1-7։
ՀԱՐՑ — Եսայու առակի իմաստը ո՞րն էր։
ՊԱՏ․ — Սա մերժման մասին առակ է։ Այնուամենայնիվ, սա կրոնավոր չար մարդկանց մերժումն էր Աստծո կողմից։ Խաղողի այգին Իսրայելն է, և Աստված ժողովրդի մասին լավ հոգ էր տարել՝ ստեղծելով հնարավոր ամենալավ պայմանները, բայց Իսրայելը արդարության փոխարեն չարություն վերարտադրեց՝ հասարակության մեջ արյունահեղության և ճնշումների տեսքով (5:7), (մետաֆորի լեզվով՝ անպետք խաղող լավի փոխարեն): Այս առակը հիշելով՝ եկե՛ք կարդանք Մարկոս 12-ում գրառված Հիսուսի պատմությունը:
IV. Առակը։ Մարկոս 12:1-8։
Ծանուցում: Քանի որ առակի նպատակն է արթնացնել երևակայությունը, լսե՛ք այս առակը և փորձե՛ք պատկերացնել այն: Գուցե նույնիսկ փակեք ձեր աչքերը և փորձեք պատկերացնել այն: Եսայիայի պատմության նման, սա նույնպես մերժման պատմություն է: Փորձե՛ք այն տեսնել մտովի:
>>>> Դո՛ւք կարդացեք Մարկոս 12:1-8։
ՀԱՐՑ — Դուք ի՞նչ պատկերացրիք։
ՀԱՐՑ — Այս պատմության իմաստը ո՞րն էր։
ՀԱՐՑ — Ո՞վ է տերը։
ՊԱՏ․ — Աստված, այդպես չէ՞։
ՀԱՐՑ — Խաղողի այգին ի՞նչն է ։
ՊԱՏ․ — Մեր կյանքը։
ՀԱՐՑ — Ովքե՞ր են խաղողի վազը էտողները կամ ֆերմերները։
ՊԱՏ․ — Այդ մարդիկ մարմնավորում էին Հիսուսի օրերի կրոնական առաջնորդներին։ Այս առակում Նա նրանց մասին էր պատմում։
ՀԱՐՑ — Բերքը հավաքելու համար ովքե՞ր ուղարկվեցին ծառաների մոտ։
ՊԱՏ․ — Սրանք այն մարգարեները, քարոզիչները և հավատացյալներն էին, որոնք առաջնորդներին ասացին, որ Աստված իրավունք ունի իրենց ուղղորդելու։ Իրենք Նրանն էին, և Նա իրավունք ուներ ղեկավարությանն ասելու, թե ինչպես առաջնորդել։
ՀԱՐՑ — Եսայի գրքում գրառված առակը Հիսուսի առակին ինչքանո՞վ է նման։
ՊԱՏ․ — Երկուսն էլ ոչ պատշաճ արձագանքի պատճառով մերժման և դատապարտելու մասին էին ։
ՀԱՐՑ — Որդին ո՞ւմ էր ներկայացնում։
ՊԱՏ․ — Որդին ներկայացնում էր Հիսուս Քրիստոսին։
Ծանուցում: Այս փոքրիկ պատմությամբ Հիսուսն ակնհայտորեն հարձակվում էր Իր օրերի կրոնական առաջնորդների վրա։
Ծանուցում: Հիսուսը հստակ ասաց, որ Նա ավելին էր, քան մարգարեն, Նա որդի՛ն էր: Իրեն մերժողներին Հիսուսը նրբորեն հասկացնում էր, որ Ինքը Աստծո Որդին է։ (Բարքլի, էջ 293-295):
ՀԱՐՑ — Այս պահին Հիսուսը գիտե՞ր, թե Իր հետ ի՞նչ էին պատրաստվում անել։
ՊԱՏ․ — Այո, Նա գիտեր։ Նա գիտեր, որ այդ մարդիկ պատրաստվում էին Իրեն սպանել։ Այս փոքրիկ պատմությունով Նա կանխատեսում էր Իր մահը։
ՀԱՐՑ — Ինչո՞ւ էին նրանք մտածում, որ որդուն սպանելով՝ նրանք ձեռք կբերեն հողատարածքը։
ՊԱՏ․ — Իրականում, եթե սեփականատերը մեռած էր, հնարավոր էր, որ կարողանային պահանջել սեփականության այլևս անտեր հողը (Լեյն, էջ 418): Ուշադրությո՛ւն դարձրեք, որ նրանք կարծում էին, որ հայրը կամ շատ հեռու է որեւէ բան անելու համար, որ չէր գործի համապատասխան, և որ կամ էլ Հայրը հենց ինքն էլ մահացած էր: Կրոնական առաջնորդներն այսօր հաճախ մտածում են, որ կարող են իրենց ղեկավարության ներքո գտնվող մարդկանց հետ վարվել, ինչպես ցանկանում են՝ առանց անհանգստանալու, թե Աստված ինքը ի՞նչ է ցանկանում:
ՀԱՐՑ — Նորից՝ սեփականատերը ո՞ւմ էր մարմնավորում։
ՊԱՏ․ — Աստծուն։ Այսօր շատերը կարծում են, որ գործնական տեսանկյունից Աստված կամ մեռած է, կամ շատ հեռու է, այսինքն՝ որևէ ձևով, միևնույնն է, չի միջամտի։ Հիսուսի օրերում նրանք սխալ էին։ Այսօր շատերը հավանական է, որ կվարվեն ձեզ հետ այնպես, ինչպես Աստծո Որդու հետ վարվեցին։ Զարմանալիորեն մարդիկ բավականին սխալ բաներ են անում և կարծում են, որ արածները կմարսեն:
>>>> Ինչ-որ մեկը թող կարդա Սաղմոս 37:34-39։
V. Վերջնական արդյունքը․ Մարկոս 12:9-12։
>>>> Ինչ-որ մեկը թող կարդա Մարկոս 12:9-12։
ՀԱՐՑ — Ըստ Աստվածաշնչում գրածի՝ նրանք մարսեցի՞ն իրենց արածը։
ՊԱՏ․ — Ոչ։ Աստված եկավ, սպանեց մշակներին, և խաղողի այգին հանձնվեց ուրիշներին (Մարկոս 12:9)։
ՀԱՐՑ — Ըստ 12:10-11-ի՝ Հիսուսն արդարացվո՞ւմ է։
ՊԱՏ․ — Այո՛։ Քարը, որ շինարարները մերժեցին, դարձավ անկյունաքար (Մարկոս 12: 10-11): Այդ օրվա կրոնական առաջնորդները մերժեցին Հիսուսին, և Նա դարձավ Իսրայելի հույսի հիմնական տարրը: Ավելին էլ ի՞նչ կարող է լինել՝ Հիսուս Քրիստոսն առանցքային քարն է, առացքային տարրը մեր հավիտենական ճակատագրի:
ՀԱՐՑ — Ո՞ւմ կհանձնվի այգին։ Այլ կերպ ինչպե՞ս կարող է այգին հասկացվել։
ՊԱՏ․ — Աստծո մարդիկ։ Աստծո մարդկանց համար նոր առաջնորդներ կլինեն։
Ծանուցում։ Բոլորը թող բացեն Ա Պտ․ 2:4-10։
>>>> Ինչ-որ մեկը թող կարդա Ա Պտ․ 2:4-10։
ՀԱՐՑ — Քանի՞ մարդ եք ճանաչում եկեղեցիներում, որ «անպիտան քարեր են»։
ՊԱՏ․ — Շատ մարդիկ պարզապես եկեղեցի են այցելում, բայց «կենդանի քարեր» չեն: «Կենդանի քարեր» լինելու համար պետք է կապված լինեն «Կենդանի Քարի» հետ: Ապրելու համար դուք պետք է նախևառաջ կենդանի լինեք. դուք պետք է կրկին ծնվեք: Սրա մասին ոմանք տեղյակ չեն:
Ծանուցում։ Ընտրված, թագավորական ևսուրբ լինելու մեր կարգավիճակը կապված է Նրա հետ, ով մերժված էր: Կարծում է, որ մենք նույնպես պետք է պատրաստ լինենք մերժվելու, հակառակ դեպքում չենք կարող լինել Նրա հետ: ( Օրինակ բերեք այն քրիստոնյաներին, ում դուք գիտեք, որ մերժված և հալածված են եղել Տիրոջը հավատարիմ մնալու պատճառով):
Ծանուցում։ Բացե՛ք Գործք 4:8-14։
>>>> Ինչ-որ մեկը թող կարդա Գործք 4:8։
Ծանուցում։ Տեսե՛ք՝ Պետրոսի մասին ի՞նչ է ասում․ «Նա Սուրբ Հոգով լի էր խոսելիս»։ Աստծո Հոգին էր Պետրոսին լցնում։
>>>> Ինչ-որ մեկը թող կարդա Գործք 4:9-12։
Ծանուցում: Նկատի ունեցեք, որ նրանք այստեղ դատվում էին բուժված մարդու պատճառով։ Ի պատասխան մեղադրանքներին՝ Պետրոսն ասում էր, որ այս բժշկության զորությունը կապված էր Նազովրեցի Հիսուս Քրիստոսի անվան հետ: Այնուհետև նա մատնանշեց, որ նրանք խաչեցին Նրան, և որ Նա անկյունաքարն էր, որը մերժվեց: Պետրոսն ու Հովհաննեսը չէին պատրաստվում ետ կանգնել, քանի որ 12-րդ հատվածում նրանք նշում են, որ փրկությունը մեկ այլ անունով չի կարող լինել: Նրանք հասկանում էին, որ «Մերժված»-ը աշխարհի փրկության բանալին էր:
>>>> Ինչ-որ մեկը թող կարդա Գործք 4:13-14։
ՀԱՐՑ — Պետրոսի և Հովհաննեսի քաջությունը այս իշխանությունները ինչի՞ն էին վերագրում։
ՊԱՏ․ — Այս երկու երիտասարդներն այստեղ լուրջ խնդիրների հետ էին առնչվում, բայց չնայած այն բանին, որ նրանք անուսում ու անգրագետ էին, նրանք բավականին ինքնավստահ էին: Նրանց մեղադրողները զարմանում էին և ասում. «Նրանք Հիսուսի հետ էին»: Ճշմարիտ է այն, որ մենք կմերժվենք, եթե մենք մեզ ասոցացնենք Հիսուսի հետ և վարվենք այնպես, ինչպես Նա վարվեց: Լավ նորությունն այն է այստեղ, որ մենք կփոխվենք: Եթե մարդիկ նման վստահություն չեն տեսնում մեր մեջ, գուցե դա այն պատճառով է, որ դեռ պետք է անցնենք առաքյալների փորձառություններով:
ՀԱՐՑ — Ըստ 14-րդ տողի՝ ի՞նչը լռեցրեց իշխանություններին։
ՊԱՏ․ — Բժշկված մարդու ներկայությունը։ Այս մարդիկ Աստծո ձեռքերում հզոր գործիք էին՝ ողորմության մեծ գործեր կատարելու։ Բավականին դժվար էր նման գործերը անտեսել։
Ծանուցում։ Նա մերժվեց, բայց Նրա մերժումը մեզ զորացրեց: Մի՛ ամաչեք Նրա խոնարհությունից, քանի որ եթե մենք պատրաստ լինենք նմանվելու Նրան, ապա մենք կլինենք խաղողի այգու նոր այգեգործները, նոր ֆերմերները, և իր Թագավորության նոր առաջնորդները:

ԱՍՏՎԱԾԱՇՆՉՅԱՆ ՀՂՈՒՄՆԵՐ

Մարկոս 12:1-12
Չար մշակների առակը
(Մտթ. 21.33-46, Ղուկ. 20.9-19)
1 Հիսուսն սկսեց նրանց հետ առակներով խոսել. «Մի մարդ այգի տնկեց, ցանկապատեց այն, հնձան փորեց ու աշտարակ շինեց. այն տվեց մշակներին և ուրիշ երկիր գնաց։ 2 Երբ ժամանակը եկավ, մշակների մոտ մի ծառայի ուղարկեց, որ մշակներից այգու բերքից վերցնի։ 3 Իսկ նրանք բռնեցին նրան, ծեծեցին ու դատարկաձեռն ուղարկեցին։ 4 Դարձյալ մի ուրիշ ծառայի ուղարկեց նրանց մոտ, և քարկոծելով ջարդեցին նրա գլուխն ու անարգելով վռնդեցին*։ 5 Եվ նորից ուրիշի ուղարկեց. սրան էլ սպանեցին։ Եվ այդպես շատ ուրիշների էլ ուղարկեց. ոմանց ծեծում էին, ոմանց՝ սպանում։ 6 Նա մի սիրելի որդի ուներ, որին վերջում ուղարկեց նրանց մոտ ու ասաց. “Գուցե որդուցս ամաչեն”։ 7 Բայց երբ մշակները տեսան, որ նա գալիս է, միմյանց ասացին. “Սա է ժառանգը. եկեք նրան սպանենք, և ժառանգությունը մերը կլինի”։ 8 Եվ նրան բռնեցին, սպանեցին ու այգուց դուրս նետեցին։ 9 Արդ այգու տերն ի՞նչ կանի. կգա ու մշակներին կորստյան կմատնի և այգին կտա ուրիշներին։ 10 Եվ դուք այն գրվածը չե՞ք կարդացել.
“Այն քարը, որ շինարարները որպես անպիտան մերժեցին,
անկյունաքար եղավ”։
11 Տերը դա արեց,
և մեր աչքերին սքանչելի է»։
Կայսրին տրվելիք հարկը
(Մտթ. 22.15-22, Ղուկ. 20.20-26)
12 Եվ ուզում էին Հիսուսին բռնել, որովհետև հասկացան, որ այդ առակն իրենց մասին ասաց, բայց ժողովրդից վախեցան, թողեցին նրան ու գնացին։

Եսայի 5:1-7
Այգու մասին երգը
1 Թող երգեմ իմ սիրելիի համար իմ սիրեցյալի երգը նրա այգու մասին։ Իմ սիրելին մի այգի ուներ մի արգավանդ բլուրի վրա։ 2 Նա ցանկապատեց այն, փորեց այն, քարերը հանեց միջից, ընտիր որթեր տնկեց, նրա մեջտեղում դիտաշտարակ կառուցեց, փորեց նաև մի հնձան և սպասեց, որ խաղող տար, բայց այն ազոխ տվեց։
3 Հիմա, ո՛վ Երուսաղեմի բնակիչներ և Հուդայի երկրի մարդիկ, դատավո՛ր եղեք իմ և իմ այգու միջև։ 4 Էլ ի՞նչ կար անելու իմ այգուն, որ ես չեմ արել նրանում. ինչո՞ւ, երբ սպասեցի, որ խաղող տար, նա ազոխ տվեց։ 5 Հիմա ես ձեզ պիտի տեղյակ պահեմ, թե ի՛նչ եմ անելու իմ այգուն. ես կվերացնեմ նրա ցանկատունկը, որ նա ճարակ դառնա, կործանելու եմ նրա եզրապատերը, որ ոտքի կոխան դառնա։ 6 Խոպան եմ թողնելու այն. չպիտի էտվի, չպիտի բրվի, և ցախ ու փուշ պիտի բուսնի նրա մեջ։ Ամպերին հրամայելու եմ, որ նրա վրա անձրև չթափեն, 7 որովհետև Զորությունների Տիրոջ այգին Իսրայելի տունն է, Հուդայի երկրի մարդիկ էլ՝ նրա ախորժելի տունկը։ Նա սպասում էր իրավունքի, և ահա արյունահեղություն, արդարություն, և ահա աղաղակ տառապալից։

Սաղմոս 37:34-39
34 Սպասի՛ր Տիրոջը և պահի՛ր նրա ճանապարհը, և նա կբարձրացնի քեզ, որ ժառանգես երկիրը և տեսնես ամբարիշտներին իրենց ոչնչանալու ժամանակ։
35 Ես ամբարիշտին տեսա գոռոզ և տեղը հաստատ, ինչպես ճյուղատարած դալար ծառ։
36 Բայց նա անցավ. ահա նա այլևս չկա. փնտրեցի նրան, և չգտնվեց։
37 Նայի՛ր արդարին և տե՛ս ուղիղ մարդուն. այսպիսի մարդու վերջը խաղաղություն է։
38 Իսկ անիրավները միասին պիտի ոչնչանան. ամբարիշտների վերջը կորուստ է։
39 Իսկ արդարների փրկությունը Տիրոջից է. նեղության ժամանակ նա է նրանց ապաստանը։

Ա Պտ․ 2:4-10
4 մոտ եք կենդանի Վեմին, որը թեև մարդկանցից մերժված է, բայց Աստծու առաջ ընտրյալ ու պատվական է։ 5 Իսկ դուք կենդանի քարերի պես կառուցվում եք որպես հոգևոր տաճար սուրբ քահանայության համար, որպեսզի Հիսուս Քրիստոսի միջոցով Աստծուն բարեհաճ հոգևոր զոհեր մատուցեք։ 6 Որովհետև Գրքում էլ կա.
«Ահա Սիոնում դնում եմ
ընտիր, պատվական անկյունաքար,
և նրան հավատացողը չպիտի ամաչի» (Ես. 28.16)։
7 Արդ ձեզ՝ հավատացյալներիդ համար պատվական է, իսկ անհավատների համար
այն քարը, որ կառուցողները մերժեցին,
անկյունաքար եղավ (Սաղ. 118.22),
8 և
գլորման քար,
գայթակղության վեմ,
որով գայթակղվում են՝ խոսքին չհավատալով, որի համար սահմանված էին։
9 Բայց դուք ընտիր ցեղ եք, թագավորական քահանայություն, սուրբ ազգ, սեփական ժողովուրդ, որպեսզի նրա՛ առաքինությունները քարոզեք, ով ձեզ խավարից դեպի իր սքանչելի լույսը կանչեց։
10 Որովհետև դուք ժամանակին ժողովուրդ չէիք, բայց հիմա Աստծու ժողովուրդ եք, որ ողորմություն չէիք գտել, բայց հիմա արժանացել եք ողորմության։

Գործք․ 4:8-14
8 Այդ ժամանակ Պետրոսը, Սուրբ Հոգով լցված, նրանց ասաց. «Ո՛վ ժողովրդի իշխանավորներ ու Իսրայելի ծերեր, 9 եթե մենք այսօր մի տկար մարդու հանդեպ գործված բարիքի համար հարցաքննվում ենք, թե նա ումո՛վ բժշկվեց, 10 արդ թող հայտնի լինի ձեզ բոլորիդ և Իսրայելի ամբողջ ժողովրդին, որ Նազովրեցի Հիսուս Քրիստոսի անունով, որին դուք խաչեցիք, և որին Աստված մեռելներից հարություն տվեց. նրանով է սա հիմա ձեր առաջ առողջացած կանգնել։ 11 Սա է
ձեզանից՝ շինողներիցդ անարգված այն քարը,
որ անկյունաքար դարձավ (Սաղ. 118.22)։
12 Եվ ուրիշ մեկի միջոցով փրկություն չկա, որովհետև երկնքի տակ չկա մարդկանց տրված ուրիշ անուն, որով մենք կարող ենք փրկվել»։ 13 Եվ Պետրոսի ու Հովհաննեսի համարձակությունը տեսնելով և հասկանալով, որ անուսում ու տգետ մարդիկ են, զարմացած էին, որովհետև նրանց ճանաչում էին իբրև Հիսուսի հետևորդների։ 14 Տեսնում էին նաև այն բժշկված մարդուն՝ կանգնած նրանց հետ, և պատասխանելու ոչինչ չունեին։