ՄԱՐԿՈՍ 13:24-37 ԴԱՍ # 38
ԵՐԿՐՈՐԴ ԳԱԼՍՏՅԱՆ ՃՇՄԱՐՏՈՒԹՅԱՆ ԲԱՆԱԼԻՆ
I. Ողջույնի խոսք։
II. Ներածություն։
Ծանուցում։ Այս դասի ընթացքում կենտրոնանալու ենք բանալի բառերի վրա, այնպես որ ուշադի՛ր եղեք: Հուսամ, որ այսկերպ մենք կկարողանանք հստակ տեսնել և հասկանալ, թե ինչ է ասում Հիսուսը այնպես, ինչպես դա տեսավ-հասկացավ վաղ եկեղեցին: Նրանք մեզանից շատերի նկատմամբ առավելություն ունեին այն բանում, որ ոտքից գլուխ խրված էին Հին Կտակարանի ճշմարտությունների և մետաֆորների մեջ։
Ծանուցում։ Բանալի արտահայտություններ՝ Մարկոս 13-ը (և Մատթեոս 24) հասկանալու համար։
Ա. “այդ օրը” = Հին Կտակարանում այս արտահայտությունը վերաբերում է դատաստանի վերջին օրվան։
Բ. “այդ բաները” = անմիջական իրադարձությունները, որոնք վերաբերում էին Մարկոս 13:4-ին (Երուսաղեմի անկումը և Տաճարի ոչնչացումը). >>>> Ինչ-որ մեկը թող կարդա Մարկոս 13:4։
Ծանուցում։ Մարկոս 13:24-27 = “այդ” կամ “այդ օրերը” = Ժամանակների վերջի դատաստանը։
Մարկոս 13:28-31 = “այդ բաները” = Երուսաղեմի ավերումը մ․թ․68-ին։
Մարկոս 13:31-37 = “այդ օրը” = Ժամանակների վերջի դատաստանը։
III. Մարդու Որդու Գալուստը․ Մարկոս 13: 24-27։
>>>> Ինչ-որ մեկը թող կարդա Մարկոս 13:24-27
ՀԱՐՑ — Մարդու Որդու գալուստը ե՞րբ կլինի։
ՊԱՏ․ — 13:14-20-ում ասված նեղություններից հետո: Քրիստոսը կգա, բայց միայն փորձություններից և դժվարություններից հետո: Հաճախ է այսպես լինում, երբ էլ որ Աստված գա: Նա Իսրայելին այցելեց Եգիպտոսում այն բանից հետո, երբ նրանք արդեն երկար տարիներ ստրուկ էին: Զորավոր ձևով Աստված այցելեց Դավիթ թագավորին, բայց միայն ավելի քան մեկ տասնամյակ սարսափելի նեղություններից հետո: Ձեզանից նրանք, ովքեր իսկապես ճանաչում են Տիրոջը, փորձեք հետադարձ մտածել այն պահերի մասին, երբ Աստված ձեզ շատ մոտ է եկել։ Բազմիցս դա տեղի է ունենում դժվարությունների և փորձությունների ժամանակ, որոնք օգնում են մեզ լինել ավելի ընկալունակ և բաց, որպեսզի Աստծված մուտք գործի մեր կյանք: Բայց Քրիստոսի գալուստին նախորդելու են նեղություններ:
ՀԱՐՑ — Ի՞նչ էր նկարագրվում 13:24-25-ում։
ՊԱՏ․ — Երկնքում ցնցումներ.«տիեզերքը միավորված է մարդու հետ իր ճակատագրով», այսպիսով, քանի որ մարդկային ճակատագիրը պետք է ռադիկալ ազդեցություն կրեր այդ ամենից, նրանք «ազատորեն խոսեցին երկնքում տեղի ունենալիք ցնցումների մասին» (Լեյն, էջ 475):»
>>>> Ինչ-որ մեկը թող կարդա Ես․ 13:10-13.
ՀԱՐՑ — Ինչպե՞ս էր Մարդու Որդին գալու։
ՊԱՏ․ — Ամպերի վրայով՝ մեծ զորությամբ ու փառքով։
>>>> Երեք տարբեր մարդկանց խնդրե՛ք, որ կարդան Նվ․ 1: 3, Սղ․ 97: 2-6, Դն․ 7: 13-14 համարները։
Ծանուցում։ Երբ Հիսուսն սկսեց նման ձևով խոսել Մարկոս 13-ում, Ղուկաս 21-ում կամ Մատթեոս 24-ում, ապա դուք կարող եք հստակ տեսնել, թե ինչպես է դա հասկացել վաղ եկեղեցին: Դա վեհ ու հզոր Հիսուսն էր:
ՀԱՐՑ — Հիսուսի մասին այս տեսակետը ինչպե՞ս է տարբերվում Սուրբ Ծննդյան պատմության մեջ ներկայացված տեսակետից։
ՊԱՏ․ — Մեկը խոսում է մի երեխայի մասին, որ ծնվել է աղքատ, խեղճ և խոնարհ: Երեխան քաղցր է, մատչելի և ոչ սպառնալից: Մարկոս 13-ը խոսում է հզոր մարտիկի մասին, որը գալիս է երկիր ջախջախիչ և ավերիչ ուժով: Հիսուսը կգա նորից, բայց դա չի լինի այնպես, ինչպես Նրա առաջին գալուստն էր: Առաջին անգամ Նա եկավ որպես երեխա և մահացավ որպես Գառ: Նա կվերադառնա որպես մարտիկ և մռնչացող Առյուծ:
Ծանուցում։ Սկզբում Աստված մեզ նրբորեն կմոտենա, բայց եթե մենք չարձագանքենք Նրան, ապա կառնչվենք Նրա բարկության հետ: Միգուցե մեզ հաճելի չէ նման բաներ լսելը, բայց այնուամենայնիվ, սա է ճշմարիտը։
Ծանուցում։ Պատմական Հիսուսի կյանքը եղել է քողարկված զորության և խոնարհության կյանք։ Իր Երկրորդ Գալուստը կլինի ամպերի վրայով և բացահայտ զորությամբ։
ՀԱՐՑ — Ինչպե՞ս էր Հիսուսի գալուստը տարբերվում Մարկոս 13։21-ում նկարագրված գալուստից։
ՊԱՏ․ — Ի հակադրություն ամպերի վրայով բացահայտ փառքով գալուն (աշխարհահայտ գալուստ)՝ 21-րդ համարը նկարագրում է տեղային դրսևորումները: Եթե ինչ-որ մեկը աշակերտներին ասեր, որ իրենք են Մեսիան, ապա աշակերտները հետևյալ կերպ պետք է պատասխանեին. «Լավ, երբ երկինքը պատռես, այն ժամանակ էլ ես կհավատամ: Մինչ այդ ինձ մի՛ անհանգստացրու»:
Ծանուցում։ 13:27-ում ընտրյալներին հավաքելը դասական Հին Կտակարանի թեմա է։
>>>> Ինչ-որ մեկը թող կարդա Ես․ 43:6-7։
IV. Մոտ իրականցամանը = հաստատում․ Մարկոս 13:28-31։
>>>> Ինչ-որ մեկը թող կարդա Մարկոս 13:28-31։
ՀԱՐՑ — Թզենու առակում հիմնական շեշտադրությունն ի՞նչն էր։
ՊԱՏ․ — Թուզը խոսում է գալիք բերքի մասին: Հին Կտակարանում բերքը դատաստանի փոխաբերություն էր։ >>>> Ինչ-որ մեկը թող կարդա Ամս․ 8:1-2։
Ծանուցում։ Ձիթենյաց լեռան վրա հսկայական թզենիներ կային (20-30 ոտնաչափ բարձրությամբ): Վաղ գարուն էր, երբ Հիսուսը խոսում էր, ուստի նրանք բազում թզենիներ էին տեսնում իրենց շրջակայքում, որոնք տերևներ էին տալիս: Ամառն էր գալիս: Հովտին նայելիս նրանք կարող էին տեսնել Տաճարը:
Ծանուցում։ Մարկոս 13: 28-31-ը մատնանշում է Երուսաղեմի անկումը: Դա պետք է տեղի ունենար իրենց օրերին: Մոտավորապես մ․թ․ 27 թվականն էր, երբ Հիսուսը խոսում էր, և Երուսաղեմի անկումը տեղի ունեցավ մ.թ. 68 թվականին: Այդ սերունդը տեսնելու էր փլուզումը այն հրաշագեղ շինության, որին երբևէ նրանց բախտ էր վիճակվել ականատես լինել (Մարկոս 13.2):
Ծանուցում։ >>>> Ինչ-որ մեկը թող կարդա Ես․ 40:7-8. Աստծու Խոսքը երբեք չի կորչում, և Հիսուսի Խոսքը Աստծո Խոսքն է: >>>>Նորի՛ց կարդացեք Մարկոս 13:31։
Երուսաղեմի անկումը Հիսուսի խոսքի անմիջական ապացույցն էր, ուստի տրամաբանական էր լուրջ վերաբերվել այն խոսքերին, ինչ Հիսուսն ասաց Մարկոս 13: 32-37-ում ավելի հեռու ապագայի մասին:
V. Զգոնությունը՝ հակառակ սպեկուլյացիաների․ Մարկոս 13:32-37։
>>>> Ինչ-որ մեկը թող կարդա Մարկոս 13:32-37։
ՀԱՐՑ — Հիսուսն ի՞նչ խորհուրդ տվեց, որ նրանք անեն՝ զգոն լինել, թե՞ շահարկումների գնալ։
Ծանուցում։ Պատմությունից մենք գիտենք Երուսաղեմի անկման օրը, բայց մենք չգիտենք Հիսուսի Երկրորդ Գալստյան օրը: Հիսուսը դեռ չի՛ եկել: 13:30 և 13:32 հատվածներում մենք խոսում ենք երկու հստակ ժամանակահատվածների մասին: Մեկը ՝ Երուսաղեմի անկումը մ․թ․ 68 -ին, մենք գիտենք: Մյուսը ՝ Երկրորդ Գալուստը, որ բացահայտորեն մեզ ասվում է, որ շահարկումների ճանապարհով մենք չենք կարող իմանալ, թե դա հստակ երբ կլինի։
Ծանուցում։ Այսօր շատերն են շահարկումներ անում Երկրորդ Գալստյան հստակ օրվա առումով՝ փոխարենը լսելու Հիսուսի ասածներին: Մենք ցանկանում ենք իմանալ ճշգրիտ ամսաթիվ, որպեսզի կարողանանք վերահսել իրադրությանը: Հիսուսն ասել է, որ պատրաստ լինենք: Տրամաբանական է, որ եթե մենք Հիսուսին հանձնենք մեր կյանքի ղեկը, մենք պատրաստ կլինենք:
ՀԱՐՑ — Ինչպե՞ս մենք պետք է զգոն լինենք և պատրաստ։
ՊԱՏ․ — Մեզնից յուրաքանչյուրը պետք է կատարի իր պարտականությունները։ Տե՛ս 13:34-37։ Հովհան Ոսկեբերանը մեզ հիշեցնում է (էջ 460)․
«Երկրի վրա պայքար կա … բայց երկնքում պսակ է
Պատիժ մարդկանց կողմից… բայց Աստծո կողմից պատիվ
Երկու օր պայքար … բայց պարգևատրում հավիտենական
Պայքարեք մեր ոչնչացման ենթակա մարմինների հետ … բայց մենք ժառանգելու ենք այն, ինչ ենթակա չէ ոչնչացման»:
Ծանուցում։ Մեզ խորհուրդ է տրվել հոգիները չվաճառելու՝ այս կյանքում մի քանի կարճ տարիների ընթացքում թվացյալ ձեռքբերումների համար։ Հիսուսը կրկին գալու է Երկիր, և Նա գալու է զորությամբ և դատաստանով: Մինչ Իր Երկրորդ գալուստը՝ Նա միգուցե ձեզ համար անձամբ գա, բայց ցանկացած պարագայում առերեսվելու եք դատաստանի հետ։ Միայն հիմարն է, որ նախընտրում է կարճաժամկետ ձեռքբերումները և կորցնում երկարաժամկետը:
>>> Օրինակ բերեք։

ԱՍՏՎԱԾԱՇՆՉՅԱՆ ՀՂՈՒՄՆԵՐ

Մարկոս 13:4
. 4 «Ասա՛ մեզ, ե՞րբ են դրանք լինելու, և ո՞րն է լինելու այն նշանը, որ կազդարարի այդ բոլոր բաների կատարումը»։

Մարկոս 13:24-37
Մարդու Որդու գալուստը
(Մտթ. 24.29-31, Ղուկ. 21.25-28)
24 Բայց այդ օրերին՝ այդ նեղություններից հետո, արեգակը կխավարի, լուսինն իր լույսը չի տա։ 25 Աստղերը երկնքից կընկնեն, ու երկնային զորությունները կսասանվեն։ 26 Այն ժամանակ կտեսնեն Մարդու Որդուն, որ գալիս է ամպերի վրայով (Դան. 7.13) մեծ զորությամբ ու փառքով։ 27 Այն ժամանակ նա կուղարկի իր հրեշտակներին և կհավաքի իր ընտրյալներին չորս կողմերից՝ երկրի ծայրից մինչև երկնքի ծայրը։
Թզենու դասը
(Մտթ. 24.32-35, Ղուկ. 21.29-33)
28 Բայց դաս առեք թզենո՛ւ օրինակից. երբ նրա ճյուղերն արդեն փափկում են ու տերևներ են արձակում, իմանում եք, որ ամառը մոտ է։ 29 Այդպես էլ դուք. երբ տեսնեք, որ այս ամենը տեղի է ունենում, իմացե՛ք, որ վերջը մոտեցել է։
30 Ճշմարիտ եմ ասում ձեզ, որ մինչ այս սերունդը ապրում է, այս ամենը տեղի կունենա։ 31 Երկինքն ու երկիրը կանցնեն, բայց իմ խոսքերը չեն անցնի։
Ոչ ոք չգիտի օրը և ժամը
(Մտթ. 24.36-44, Ղուկ. 21.34-36)
32 Սակայն այդ օրվա ու ժամի մասին ոչ ոք չգիտի՝ ո՛չ հրեշտակները երկնքում, ո՛չ էլ Որդին, այլ միայն Հայրը։ 33 Զգո՛ւյշ եղեք, արթո՛ւն մնացեք ու աղոթե՛ք*, որովհետև չգիտեք, թե ժամանակը ե՛րբ է գալու։ 34 Ինչպես այն մարդը, որ հեռու աշխարհ գնալիս իր տունը կթողնի, իր ծառաներին իշխանություն կտա, յուրաքանչյուրի համար իր գործը կսահմանի, իսկ դռնապանին կհրամայի, որ արթուն մնա։ 35 Արդ, արթո՛ւն կացեք, քանի որ չգիտեք, թե տանտերը ե՛րբ կգա՝ երեկոյա՞ն, թե՞ կեսգիշերին, աքլորականչի՞ն, թե՞ առավոտյան։ 36 Չլինի թե հանկարծակի գա և ձեզ քնած գտնի։ 37 Եվ ինչ որ ձեզ ասում եմ, բոլորին եմ ասում՝ արթո՛ւն կացեք»։

Մատթեոս 24
Հիսուսը խոսում է տաճարի կործանման մասին
(Մրկ. 13.1-2, Ղուկ. 21.5-6)
1 Երբ Հիսուսը տաճարից դուրս էր եկել և գնում էր, աշակերտները մոտեցան, որ նրան տաճարի շինվածքը ցույց տան։ 2 Հիսուսը նրանց ասաց. «Տեսնո՞ւմ եք այդ ամենը։ Ճշմարիտ եմ ասում ձեզ. այդտեղ քարը քարի վրա չի մնալու, որ չքանդվի»։
3 Մինչ նա նստած էր Ձիթենյաց լեռան վրա, աշակերտներն առանձին մոտեցան նրան ու ասացին. «Ասա՛ մեզ, ե՞րբ են դրանք լինելու, և ո՞րն է լինելու քո գալստյան ու աշխարհի վերջի նշանը»։
Տառապանքներ և հալածանքներ
(Մրկ. 13.3-13, Ղուկ. 21.7-19)
4 Հիսուսը պատասխանեց ու ասաց նրանց. «Զգո՛ւյշ եղեք, որ որևէ մեկը ձեզ չխաբի, 5 որովհետև շատերն իմ անունով կգան ու կասեն. “Ես եմ Քրիստոսը”, և շատերին կմոլորեցնեն։ 6 Լսելու եք պատերազմների ձայներ ու պատերազմների լուրեր։ Տեսե՛ք, որ չսարսափեք, որովհետև այդ ամենը պետք է լինի, սակայն դա դեռ վերջը չէ։ 7 Ազգն ազգի դեմ վեր կկենա, և թագավորությունը՝ թագավորության դեմ. լինելու են սով և տեղ առ տեղ երկրաշարժեր։ 8 Բայց այս ամենը սկիզբն է երկունքի։
9 Այդ ժամանակ ձեզ նեղության են մատնելու և սպանելու են ձեզ, իմ անվան պատճառով բոլոր հեթանոս ազգերի կողմից ատելի եք լինելու։ 10 Եվ այդ ժամանակ շատերն են գայթակղվելու, միմյանց մատնելու և միմյանց ատելու։ 11 Եվ բազում սուտ մարգարեներ են ելնելու և շատերին մոլորեցնելու։ 12 Եվ անօրենության բազմանալու պատճառով շատերի սերն է սառչելու։ 13 Բայց ով մինչև վերջ համբերի, նա կփրկվի։ 14 Եվ արքայության այս Ավետարանը քարոզվելու է ամբողջ աշխարհով՝ որպես վկայություն բոլոր հեթանոսներին, և այդ ժամանակ գալու է վերջը։
Մեծ սրբապղծությունը
(Մրկ. 13.14-23, Ղուկ. 21.20-24)
15 Արդ, երբ տեսնեք ավերածության սրբապղծությունը՝* սուրբ վայրում կանգնած, որի մասին ասված է Դանիել մարգարեի միջոցով (ով կարդում է, թող հասկանա), 16 այդ ժամանակ ովքեր Հրեաստանում լինեն, թող լեռները փախչեն, 17 ով տանիքի վրա լինի, թող չիջնի տնից որևէ բան վերցնելու, 18 ով հանդում լինի, թող հետ չդառնա իր հագուստները վերցնելու։ 19 Բայց վա՛յ հղիներին ու ստնտուներին այն օրերին։ 20 Աղոթե՛ք, որ ձեր փախուստը ձմռանը չլինի, ոչ էլ շաբաթ օրը։ 21 Որովհետև այդ ժամանակ այնպիսի մեծ նեղություն կլինի, որպիսին աշխարհի սկզբից մինչև հիմա չի եղել, ոչ էլ երբևէ կլինի։ 22 Եվ եթե այդ օրերը չպակասեցվեին, ոչ ոք չէր փրկվի. սակայն ընտրյալների համար այդ օրերը կպակասեցվեն։ 23 Այդ ժամանակ եթե մեկը ձեզ ասի՝ “Քրիստոսն ահա այստեղ է կամ այնտեղ”, չհավատաք։ 24 Որովհետև ելնելու են սուտ քրիստոսներ ու սուտ մարգարեներ և մեծ նշաններ ու հրաշքներ են ցույց տալու, որ եթե հնարավոր լինի, ընտրյալներին էլ մոլորեցնեն։ 25 Ահա նախապես ձեզ ասացի։ 26 Արդ, եթե ձեզ ասեն՝ “Ահա անապատում է”, չելնեք, “Ահա մառանում է”, չհավատաք։ 27 Որովհետև ինչպես որ կայծակն է արևելքից ելնում ու մինչև արևմուտք երևում, այնպես էլ Մարդու Որդու գալուստն է լինելու. 28 որտեղ դիակն է, արծիվներն այնտեղ են հավաքվում։
Մարդու Որդու գալուստը
(Մրկ. 13.24-27, Ղուկ. 21.25-28)
29 Նեղության այդ օրերից հետո
արեգակն իսկույն կխավարի,
լուսինն էլ իր լույսը չի տա.
աստղերը երկնքից կընկնեն,
ու երկնքի զորությունները կշարժվեն։
30 Այդ ժամանակ երկնքում կերևա Մարդու Որդու նշանը, և այդ ժամանակ երկրի բոլոր ցեղերը կողբան ու կտեսնեն Մարդու Որդուն, որ գալիս է երկնքի ամպերի վրայով (Դան. 7.13, Մտթ. 26.64բ), զորությամբ ու մեծ փառքով։ 31 Եվ նա կուղարկի իր հրեշտակներին բարձրաձայն փողահարությամբ, որոնք կհավաքեն նրա ընտրյալներին չորս հողմերից՝ երկնքի ծայրից մինչև մյուս ծայրը։
Թզենու դասը
(Մրկ. 13.28-31, Ղուկ. 21.29-33)
32 Թզենու առակի՛ց դաս առեք. երբ նրա ճյուղերն արդեն փափկել են, ու տերևը բուսել է, իմանում եք, որ ամառը մոտ է։ 33 Այդպես էլ դուք. երբ այս ամենը տեսնեք, իմացե՛ք, որ վերջը դռների մոտ է։ 34 Ճշմարիտ եմ ասում ձեզ. այս սերունդը չի անցնի, մինչև որ այս ամենը չկատարվի։ 35 Երկինքն ու երկիրը կանցնեն, բայց իմ խոսքերը չեն անցնի։
Օրը և ժամը ոչ ոք չգիտի
(Մրկ. 13.32-37, Ղուկ. 21.34-36)
36 Սակայն այդ օրվա ու ժամի մասին ոչ ոք չգիտի՝ ո՛չ երկնքի հրեշտակները և ո՛չ էլ Որդին, այլ միայն Հայրը։ 37 Մարդու Որդու գալուստը կլինի Նոյի օրերի պես։ 38 Որովհետև ինչպես որ ջրհեղեղին նախորդած օրերին էին ուտում ու խմում, կին էին առնում ու մարդու գնում մինչև այն օրը, երբ Նոյը տապան մտավ, 39 և չիմացան, մինչև որ ջրհեղեղը եկավ ու բոլորին վերացրեց, Մարդու Որդու գալուստն էլ է այդպես լինելու։
40 Այդ ժամանակ արտում երկու հոգի կլինեն. նրանցից մեկը կվերցվի, իսկ մյուսը կթողնվի։ 41 Եվ եթե մի ջրաղացում երկու կին աղալիս լինեն, մեկը կվերցվի, իսկ մյուսը կթողնվի։
42 Արդ արթո՛ւն կացեք, որովհետև չգիտեք, թե ձեր Տերը ո՛ր ժամին կգա։ 43 Բայց սա իմացե՛ք, որ եթե տան տերն իմանար, թե գողը ո՛ր պահին է գալու, արթուն կմնար ու թույլ չէր տա, որ իր տուն սողոսկեր։ 44 Դրա համար դո՛ւք էլ պատրաստ եղեք, որովհետև Մարդու Որդին կգա այն ժամին, երբ դուք չեք սպասի։
Հավատարիմ և չար ծառաները
(Ղուկ. 12.41-48)
45 Ո՞վ է արդյոք այն հավատարիմ ու իմաստուն ծառան, որին իր տերը ծառաների վրա կարգեց, որպեսզի ժամանակին նրանց կերակուր տա։
46 Երանի՜ այն ծառային, որի տերը երբ գա, նրան այդպես անելիս կգտնի։ 47 Ճշմարիտ եմ ասում ձեզ, որ նրան իր ողջ ունեցվածքի վրա կկարգի։ 48 Բայց եթե այդ ծառան չար լինի և իր մտքում ասի՝ “Իմ տերն ուշանում է գալ”, 49 և սկսի իր ծառայակիցներին ծեծել ու հարբեցողների հետ ուտել և խմել, 50 այդ ծառայի տերը կգա մի օր, երբ նա չի սպասում, այն ժամին, երբ նա տեղյակ չի լինի։ 51 Եվ նրան մեջտեղից կկտրի ու նրա բաժինը կեղծավորների հետ կդնի։ Այնտեղ կլինի լաց և ատամների կրճտոց»։

Ես․ 13:10-13
10 որովհետև երկնքի աստղերն ու նրանց աստղաբույլերն իրենց լույսը չեն տալու, արեգակը ծագելիս խավարելու է, և լուսինն իր լույսը չի ճառագայթի։ 11 «Ես կպատժեմ աշխարհին իր չարության համար և ամբարիշտներին իրենց անօրենության համար. կդադարեցնեմ հպարտների ամբարտավանությունը և կխոնարհեցնեմ բռնավորների գոռոզությունը։ 12 Ես մարդուն ավելի հազվագյուտ պիտի դարձնեմ, քան մաքուր ոսկին, և մարդ արարածին ավելի հազվագյուտ, քան Օփիրի ոսկին»։ 13 Դրա համար կցնցեմ երկինքը, և երկիրն իր տեղից կսասանվի, Զորությունների Տիրոջ վրդովմունքի ժամանակ՝ բորբոք բարկության օրը։
Նվ․ 1: 3
3 Տերը համբերատար է և մեծազոր և Տերը երբեք չի արդարացնի հանցավորին. Տիրոջ ճանապարհը մրրիկի և փոթորկի մեջ է, և ամպերը նրա ոտքերի փոշին են։

Սղ․ 97: 2-6
2 Ամպ ու մառախուղ կա նրա չորս կողմը, արդարությունը և իրավունքը նրա գահի հիմքերն են։
3 Կրակ է գնում նրա առջևից և այրում է նրա չորս կողմը եղած թշնամիներին։
4 Նրա փայլակները լուսավորում են աշխարհը. երկիրը տեսնում է և դողում։
5 Սարերը մոմի պես հալվում են նրա ներկայությունից. ամբողջ երկիրը՝ նրա ներկայությունից։
6 Երկինքը հռչակում է նրա արդարությունը, և բոլոր ժողովուրդները տեսնում են նրա փառքը։

Դն․ 7: 13-14
13 Գիշերվա տեսիլքներում ես տեսա, որ ահա երկնքի ամպերով մեկը եկավ՝ մարդու որդու նման, եկավ դեպի Հինավուրցը և նրան ներկայացվեց։ 14 Եվ նրան իշխանություն, պատիվ ու թագավորություն տրվեցին, որպեսզի բոլոր ժողովուրդները, ազգերը և լեզուները նրան ծառայեն. նրա իշխանությունը հավիտենական իշխանություն է, որ չի անցնելու, և նրա թագավորությունը չի կործանվելու։

Ես․ 43:6-7
6 Հյուսիսին կասեմ՝ “Հանձնի՛ր”, և հարավին. “Մի՛ արգելափակիր, բե՛ր իմ որդիներին հեռվից և իմ դուստրերին՝ երկրի ծայրերից, 7 բոլոր նրանց, որոնք կոչվում են իմ անունով, և որոնց ես ստեղծել եմ իմ փառքի համար, ձևավորել և արարել եմ նրանց”»։